RCLM Baucau (10/12/2025)—Xefe Suku Namanei José Ximenes preokupa tebes ho proposta Postu Saúde foun iha suku Namanei postu administrativo Quelicai Antigo Munisipiu Baucau, ne’ebe manda ona ba Ministeriu Saúde iha tinan kotuk, maibe to’o agora seidauk iha Resposta ruma.
Xefe suku hateten komunidade sira presija tebes Postu Saúde ida, tamba atu asesu ba faselidade saúde difisil tebes tamba la’o ho distansia do’ok hafoin asesu ba tratamentu Saúde.
“Iha situasaun emerjensia povu tenke la’o distansia dook atu konsulta, ami hakarak governu da sia hare atu bele hari’i sentru Saúde ida iha suku Namanei, atu nune’e bele faselita komunidade hodi labele lao diatansia dook ba faselidade saúde”. Dehan José Ximenes ba jornalista RCLM Baucau, 09/12/2025
Jose Ximenes hatutan, husu ba Ministeriu Saúde atu halo aprovasaun ba proposta ne’e atu bele hari’i Postu Saúde ida ba komunidade hodi bele faselita komunidade sira.
“Hau husu ba Ministeriu Saúde karik bele tau orsamentu ida ba ami nia Postu Saúde, nune’e bele faselita komunidade sira hodi asesu ba tratamentu saúde”.
Suku Namanei kompostu husi aldeia hat hanesan wasifa, Daekou, Sirilaku no Loirae, enkuantu xefe da famila hamutuk atus lima resin no tatal populasaun rihun atus neen.
Ekipa Kobertura : RCLM
