RCLM Baucau (20-11-2025)—Sosiedade sivil iha munisipiu Baucau, preokupa kondisaun estrada área urbana Baucau vila ne’ebé aat tamba ne’e, husu Governu liu-liu Ministériu Obras Públiká aselera planu reabilitasaun.
Sosiedade Sivil husi Assosiaun Unidade Feto ba Dezenvolvimentu Bendita de Jesus Amaral, sente triste observa estrada urbana Baucau vila kondisaun kuak no tempu udan difikulta tebes movimentu komunidade ho transporte públiku, asesu merkadu no Hóspital Rejionál Eduardo Ximenes, tamba bele akontese asidente.
“Nu’udar organizasaun feto sente triste ita nia kondisaun estrada balun cor, balun husik kuak naruk to’o ohin loron ne’e fó impaktu tebes ba inan-feto sira, vendedor inklui estudante no fó risku ba ita nia inan isin-rua sira inklui ema ho defisensia,” Bendita preokupa.
Organizasaun feto iha Baucau, ejize Ministeriu kompetente aselera planu reabilitasaun estrada Baucau vila tamba antes ne’e Prezidente Autoridade Munisipiu deklara ba publiku iha media katak, halo lansamentu iha fulan novembru ne’e maibe seidauk realiza.
“Parte relevante bele aselera reabilita ka konstrusaun estrada ne’e (área urbana Baucau vila), nune’e faselita komunidade, inan isin-rua, ema ho defisensia inklui estudante,” rekomenda Diretora AUFD Baucau.
Tempu hanesan, Koordenador Assosiasaun ONG Baucau (AOB) Crispin Malic afirma, kondisaun estrada Baucau vila ne’ebé at, antes ne’e Autoridade Munisipiu deklara atu lansa iha fulan ne’e maibe bainhira la realiza sosiedade sivil sei husu klarifikasaun ba Autoridade Munisípál.
“Ami iha programa advokasia sei halo mudansa signifikativu tuir polítika sira nia desizaun, bainhira desizaun la implementa tamba sá? se planu fulan ida ne’e lahalo lansamentu ita boot sira hein sosiedade sivil sei hato’o buat ruma ba Prezidente Autoridade Munisípál para bele hatene razaun ruma,” Crispin konklui.
Entertantu estrada urbana Baucau vila hamutuk kilómetru 23 ne’ebé kondisaun aat, antes ne’e Prezidente Autoridade Munisipiu Baucau deklara ba publiku iha média elektrónika no plataforma online katak, governu sei lansa fulan ida ne’e no hela loron 10 atu remata fulan novembro maibe seidauk realiza.
Ekipa Kobertura : RCLM
