RCLM Baucau (10-11-2025)—Sentru Juventude Munisipiu Baucau (SJMB), kapasita juventude hamutuk rihun ida lima nolu resin hitu (1.057) komesa primeiru to’o terseiru trismeste iha tinan rihun rua, rua nolu resin lima (2025) ne’e.
Diretór Ezekutivu SJMB Manuel de Carvalho Marques hateten, atividade regular implementa durante fulan sia husi janeiru to’o setembru tinan ne’e fó formasaun bá joven liu rihun ida kompostu programa komputador, dalen Inglés, gitar no formasaun área seluk.
Manuel esplika, existénsia sentru juventude Munisipiu Baucau ho inisiativa fó kapasitasaun joven sira atu iha koñesementu naton molok hakat bá nivel ensiñu superior, no balun ne’ebé remata ona nivél ensiñu superiór kontinua nafatin hakle’an koñesementu hodi kompete ba servisu.
“Ita mós iha formasaun sira seluk hanesan akonselamentu kareira, Edukasaun sivika, relasaun saudavél, internet saudavél hodi kapasita ita nia joven sira iha intelekutál,” hateten Diretór SJMB ba RCLM iha nia kna’ar fatin Uatu-lete.
Nia relata difikuldade sira infrenta laiha edifísiu permante ho espasu ne’ebé luan, atu akumula foinsa’e sira barak hodi partisipa formasaun, dejafius seluk mak governu seidauk apoiu másimu ba sira nia programa regular durante ne’e maske hetan fundus husi Ministériu Juventude Desportu Arte no Kultura maibé sira konsidera lasufisiente.
“Ita nia espasu ka fatin ba joven sira aprende mak klo’ot no SJMB seidauk iha fatin permanente no ameasa futuru ba ami hasoru liu-liu liga ba polítika poder lokál entaun, zona sentru iha ba planu ba konstrusaun kámara munisipiu nian, dejafius seluk liga ba apoiu tamba sentru juventude Munisípiu Baucau seidauk hetan apoiu husi entidades relevante no governu,” tenik Manuel.
Entertantu SJMB iha rekursu na’in sia kompostu gestor programa na’in haat, treinador na’in ida, voluntariu na’in tolu no Diretór ezekutivu.
Ekipa Kobertura : RCLM
