RCLM (13-02-2026)—Servisu Munisipal Saúde Baucau liu husi sistema vijilansia no epidemólojia husi fulan janeiru to’o loron 11 fulan fevereiru, rejista kazu moras dengue hamutuk 110, ne’ebé detekta iha Hospital Rejionál Eduardu Ximenes no sentru komunitáriu saúde hamutuk 9 iha Munisipiu Baucau.
Diretor servisu Munisipal Saúde Baucau Cristiano Cipriano Belo relata, husi totál kazu dengue 110 ne’e, na’in-39 rejista iha HoREX, sentru saúde Uailili na’in-23, Sentru Saúde Venilale na’in-16, Sentru Saúde Ossoqueli na’in-12, Sentru Saúde Vemasse na’in-8, Sentru Saúde Laga na’in-3, Sentru Saúde Quelicai na’in-3, Sentru Saúde Bucoli na’in-3, Sentru Saúde Baguia na’in-2 no Sentru Saúde Tirilolo Baucau vila na’in-1.
“Ita fahe ba Postu Administrativu, kazu dengue barak liu Postu Administrativu Baucau vila hamutuk 63, Vemasse hamutuk 20, Venilale hamutuk 18, Quelicai hamutuk 4, Laga hamutuk 3 no Baguia hamutuk 2, kazu denge ne’e afeta ba grupu idade sira menus husi tinan 1 kazu 4, tinan 1 to’o 4 kazu 45, tinan 5 to’o 14 kazu 50, idade 14 to’o 24 kazu 11, ninia diagnosa distribuisaun bezeia klasifikasaun pasiente kazu dengue kaman ema na’in-87, kazu moderadu na’in-23, ita seida’uk iha kazu severa ka mate,” dehan Cristiano ba Jornalista iha nia kna’ar fatin SMS Tirilolo Baucau.
Cristiano afirma, kazu dengue kontinua aumenta tamba, liu husi intervensaun pesoál saúde nian hodi halo atividade fumigasaun, edukasaun sívika, promosaun iha sosiedade komunidade iha ona koiñesementu, no hetan sintomas ba fasilidade saúde hodi hetan tratamentu nune’e labele fó risku ba sira nia moris.
Servisu Munisipal Saúde Baucau kontinua apela komunidade sira kontinua halo prevensaun kazu dengue, hodi hamos ambiente hanesan fakar bee ne’ebe nalihun iha lata mamuk, vazu ai-funan, no fatuk kuak tenke hamos nafatin, tamba susuk afeta dengue ba ema sempre moris iha bee nalihun sira.
Komunidade Lucio Salvador Freitas apresia Servisu Munisipal Saúde Baucau hamutuk estudante estajiariu sira, tamba halo sosializasaun ba komunidade kada bairu kona ba medidas preventiva kazu dengue iha Munisipiu Baucau, maibe tuir lolos halo prevensaun sedu.
“Mesmu ke sira mai halo atendementu komum ka públiku hanesan ne’e, maibe ne’e kurativu entaun ami nia hakarak prevensaun ne’e ema seida’uk moras mak mai ita prevene, la’os ema moras tiha mak mai prevene sira seluk, maibe sira kazu dengue imunidade di’ak bele pasa hotu maibe balun imunidade ladi’ak bele grave,” dehan komunidade husi Bairu RSS Vila Nova Baucau.
Enkuantu Servisu Munisipál Saúde Baucau halo atividade, hodi intervensaun kazu dengue mak edukasaun promosaun, iha área risku dengue husi suku 26, aldeia 51 ho totál uma-kain hamutuk 4.599, no fahe abate ba uma-kain 1.611 no fumigasaunn uma-kain hamutuk 2.091.
Ekipa Kobertura : RCLM
