RCLM Baucau (19-01-2026)—Servisu Munisipal Agrikultura Baucau hamutuk Administradór Postu Administrativu ualu(8), presiza rekolla dadus área potensiál no rezultadu produsaun kada tinan tamba, durante ne’e dadus kona ba produsaun agrikula iha Munisipiu Baucau jerál de’it la’os kada produtu espesifiku.
Prezidente Autoridade Munisipiu Baucau Veneranda Eurico Lemos Martins hateten, Munisipiu Baucau hetan fasilidade agrukutura modernu husi governu liu-liu Ministeriu Agrikultura, maibe labele providensia dadus konkretu produsaun agrikultura siginifika laiha rezultadu produtividade.
Tamba ne’e PAM Baucau husu Servisu Munisipal Agrikulutura, tenke halo kordenasaun servisu Administrador Postu Administrativu ualu no xefe suku sira halo levantamentu dadus setór agrikola kada produtu hanesan hare, hortikultura, pekuaria no produtu agrikola seluk.
”Administrador postu sira ida-idak servisu hamutuk ho xefe suku sira hatene potensialidade hirak ne’e (ex kotu, feuk-ropa no seluk), tamba ita preokupa ho ita nia dadus, sé ita iha ekipamenus bot-bot ne’ebé Ministeriu fó mai ita mais ita labele providensia dadus ne’ebé konkretu ba agrikulas ne’ebé iha hanesan de’it,” PAM Baucau fó orientasaun ne’e hafoin simu ekipamentu agrikola modernu husi Ministeriu Agrikultura Floresta Pekuaria no Peskas iha resintu Administrasaun vila nova segunda feira ne’e.
Ministru Agrikultura Floresta Pekuaria no Peskas Marcos da Crúz afirma, durante ne’e dadus produsaun agrikultura seidauk harmoniza no sertifikasaun tamba ne’e husu servidor estadu no governu husi munisipiu to’o aldeia presiza servisu hamutuk rekolla dadus konkretu.
“Ita iha ona Balkaun Úniku bele fó asisténsia servisu estadu nian nivél hot-hotu iha munisipiu no nasionál kuandu ita iha dadus tau laran, ema hotu bele asesu no hamonizadu husi baze to’o nasionál ita uza dadus hanesan” dehan Ministru Agrikultura Floresta Pekuaria no Peskas.
Administradór Postu Administrativu Laga João de Castro Freitas kompromete, sei servisu hamutuk ho extensionista husi servisu agrikultura no autoridade suku, aldeia hodi rekolla dadus setór agrikultura bazéia orientasaun husi Prezidente Autoridade Munisípiu.
“Ami sei halo kordenasaun liu-liu ba extensionista ne’ebe iha Postu no Autoridade Suku, nune’e ba oin ami tenke ho dadus ida ne’ebé los bainhira postu halo planu bazeia ba dadus ne’ebé iha ona,” dehan APA Laga.
Entretantu Autoridade Postu Laga mos relata, Postu Laga ekipa tékniku husi agrikulotura rekolla ona dadus área pontesiál Setór Agrikultura natar no toos, maibe seidauk halo rekapitulasaun maibe tinan ne’e bele fornese ona dadus ne’ebe rekolla.
Ekipa kobertura : RCLM
