RCLM Baucau (29/01/2026)—Sentru Saúde Postu Administrativo Quelicai Presiza Karreta Ambulansia foun atu atende pasiente iha Postu Administrativo Quelucai Antigo, Postu Matebian no Postu Administrativo Quelicai kompostu husi suku sanolu resin lima, tamba Ambulansia ne’ebé dadaun ne’e kondisaun sempre hetan avaria bainhira transporta pasiente ba Hospital Regional Eduardu Ximenes Baucau.
Xefe Sentru Saúde Quelicai Domingos Boavida hateten, karreta Ambulansia ne’ebe dadaun halo operasaun sempre aat hela deit maske halo manutensaun bebeik maibé kontinua aat tamba ne’e, husu ba parte servisu saúde Munisípal no liu liu Ministeriu saúde atu troka.
“Los duni multifunsaun Iha Quelicai ninia tempu aloka mai iha ne’e kleur ona kuaze to’o tinan 10 ona ne’ebe ita bele dehan labele estabil loro-loron maibe ita hare ba maka failla ou avaria ona ita halo pedidu lalais sira responde soke orsida responde parte balun komu kondisaun tuan liu tiha ona entaun nia bele afeita fali ba fatin seluk ita nafatin halo esforsu para hato’o ba munisipiu para bele halo manutensaun hadia no presija ambunlanisa foun ida tan, para bele kobre hotu postu tolu ne’e”. Dehan xefe sentru saúde Quelicai Domingos Boavida ba jornalista sira iha nia knar fatin foin lalais ne’e.
Entertantu Motorista Rui Dos Santos hateten senti triste tebes tamba kada fulan sempre halo manutensaun no difisil tebes atu kobre ba Postu Tolu tamba nee husu ba Governu atu Apoio tan abulancia ida hodi bele reforsa.
“Kareta ne’e fulan fulan ami tenke hadia tamba aat beibeik no kareta mos kuaze tinan lima liu ona, bainhira ba area remotas familia pasiente tenke lori sai mai iha dalan mak ami foin ba tula tamba ne’e bele karik aumenta tan ambulansia ida tan hodi bele kobre ba iha postu tolu”. Hateten Motorista Rui dos Santos
Moras ne’ebé rejista aas iha sentru saúde Quelicai durante tinan 2025 kompostu husi moras ISPA, diarea, phenomonia, kakorok bubu, teben ho ran, parcela (Cacar air), inklui asu tata, enkuantu Medikamentus iha Sentru Saúde Quelicai Sufisiente hela hodi atende ba Pasiente sira.
