RCLM Baucau (16-07-2025)—Sekretariu Estadu Formasaun Profisionál no Empregu (SEFOPE) Munisipiu Baucau tersa ne’e konvoka reuniaun ho entidades relevante, hodi diskute preparasaun programa expozisaun kareira profisionál Edukasaun no semináriu, ne’ebé sei realiza fulan agostu tinan ne’e iha Sentru Konvensoens Baucau (CCB sígla portugés).Diretor SEFOPE Munisipiu Baucau Roumaldo António de Souza informa, objetivu husi enkontru preparasaun ne’e oinsá halo lina kordensaun ho entidades hotu Munisipiu Baucau, hodi fó susesu programa expozisaun kareira profisionál Edukasaun no semináriu ne’ebé hola parte husi estudante terseiru anu husi eskola sekundaria jerál no tékniku vokasional iha Postu Administrativu Baucau vila.
Roumaldo esplika, objetivu husi expozisaun kareira profisionál Edukasaun no semináriu ne’e, atu fó koñesementu estudante finalista tinan 2025 husi eskola sekundaria jerál no tékniku vokasional, inan-aman ekonomia sufisiente apoiu oan kontinua ba ensiñu superior, maibé balun ne’ebé laiha ekonómia bele eleva iha sentru formasaun nune’e kompete ba kampu servisu rai laran no rai li’ur.
“Ita nia estudante sira klase terseiru anu SMA tamat estudu entaun SEFOPE nia programa ne’e ba Munisipiu hotu, atu fahe informasaun ba ita nia joven sira iha ona hanoin ruma, inan aman ekonómika iha kontinua ba universidade, sira ekonómika laiha bele kontinua tuir formasaun iha sentru formasaun, tamba ne’e ita konvida entidades hotu servisu hamutuk iha munisipiu Baucau oinsá realiza aktividade ne’e” dehan Diretor SEFOPE Munisipiu Baucau Roumaldo António de Souza.
Diretor Sentru Dezenvolvimentu Komunitáriu Triloca (CDC sígla portugés) Vicente Matos Belo apresia enkontru preparasaun programa expozisaun kareira profisionál, tamba bele halo Kordenasun servisu nune’e CDC bele hola parte tamba sai parseiru ba governu liu-liu SEFOPE.
“Enkontru primeiru faze ne’e bele relata informasaun ba parseiru sira bele prepara kondisõens atu nune’e to’o loron 22-23 Agostu parte hotu preparadu,” dehan Vicente.
Enkuantu expozisaun kareira profisionál no semináriu ne’e sei hola parte husi estudante kandidatu finalista tinan 2025 hamutuk 825 husi ensiñu sekundaria jerál, privadu no tékniku vokasional hamutuk sia iha Baucau vila, orador ba semináriu ne’e mak hanesan Sekretária Estadu Formasaun Profisionál Empregu (SEFOPE), Fundus Dezenvolvimentu Kapital Umanu ( FDCH), Institutu Apoiu Dezenvolvimentu Emprejariál (IADE) no Kámara Komérsiu Industria Timor-Leste (CCI-TL) no Edukasaun.
Ekipa Kobertura : RCLM
