RCLM Baucau (03/04/2026)—Sarani katólika husi Jona Fatumaka hamutuk ho Kaben Na’in ba Kristu (KBK) Soldadu ba Kristu ADMA, inklui organizasaun THS-THM selebra Sesta-Feira Santa ho viasakra moris, husi estasaun ida to’o sanolu resin ha’at hodi refeleta Jesus Kristu nia terus no mate iha kruz.
Padre Sebastião dos Santos haktuir, Sexta-feira santa tinan 2025 ba kotuk sarani sira husi jona Fatumaka hala’o viasakra bai-bain liu husi orasaun sira, maibe tinan ida ne’e difirente tamba halo viasakra moris dalan kruz moris nian, hodi hatudu ka reflete ba sarani sira no salva nia emar sira husi sala.
“Hanesan ita nu’udar sarani katolika halo viasakra ne’e repete fali Jesus nia terus no mate, ohin sarani sira entosiazmu tebes tamba buat foun ida ba sarani sira iha zona Fatumaka,” hateten Padre Sebatião ba Jornalista sira iha Kolejio Fatumaka hafoin partisipa Viasakra moris Sexta-feira Santa.
Nia tenik, viasakra ne’e kada tinan sexta-feira santa sarani katólika sempre halo no lori lisaun ka sentidu foun ba ema nia moris.
“Ita sempre halo maibe lori lisaun sentidu foun ba ema nia moris tamba, dala-barak ita hanoin ne’e buat bai-bain ida maibe kuandu ita hare ho matan fiar nian iha nivel ne’ebe hakat iha kada moris fó sentidu foun hodi fó valor ba ema nia moris” afrima Padre Sebastião.
Iha fatin hanesan, sarani husi Jona Fatumaka Filomena da Costa sente haksolok tuir viasakra moris, tamba hatudu ba sarani sira kontinua fi’ar Jesus nune’e fó tulun ka grasa.
“Ohin viasakra ba tinan ida ne’e hau sente kontente tebes tamba, partisipa no viasakra moris ne’e hatudu ba joven no sarani sira ita iha duni Jesus ba ida-idak nia fi’ar,” hateten Filomena.
Entertantu viasakra moris hala’o iha Fatumaka, sarani entosiazmu tebes partisipa ho la’o ain no halo orasaun husi estasaun ida to’o sanolu resin haat kuaze óras rua ho balun, husi tuku sanolu resin rua meudia to’o tuku rua ho balun no ikus taka ho adorasaun kruz.
Ekipa Kobertura : RCLM
