RCLM Baucu (10-02-2026)—Projetu reabilitasaun estrada husi suku Loilubo ba Fatumaca no Venilale, la finaliza tuir data kotratu entre kompaña ho Governu liu-liu Ministeriu Planeamentu Investimentu Estratéjiku (MPIE), tamba mosu problema sosiál.
Project Managers Tobias Cipriano Rozario hateten, governu kontratu kompaña implementador tolu reabilita estrada pakote husi suku Loilubu ba Famuca no Venilale hamutuk kilómetru 18,140, maibé iha servisu iha terenu mosu problema sosiál iha fornesementu material lokal fatuk, hodi hatarde servisu iha terenu.
“Iha tinan kotuk ami simu kontratu husi governu ami hasoru difikuldade materiál fatuk ba estomansorin sei prejudika ami no foin dadauk ami dada malu ho komunidade lokál kuaze fulan hitu ami problema hela ba fatuk, depois ne’e sei hari’i fila fali estonkreser han prosesu, tamba ba ANP ne’e prosesu boot ida,” esplika project manager.
Progresu reabilitasaun estrada ne’e pakote primeiru responsabiliza husi kompaña Glory Interprise progresu foin 23,19%, pakote segundu responsabiliza husi kompaña Golden Way progresu 15,93% no pakote terseiru responsavel husi kompana Jolitóni unipsoal limitada 20,22% , maske nune’e Project managers kompremitidu kontinua esforsu hala’o, nune’e termina tinan ne’e.
Iha sorin seluk Xefe Suku Loilubo Joanico da Costa Freitas avalia, implementasaun projetu reabilitasaun estrada Loilubo Vemasse liga ba Fatumaca Baucau vila no Venilale dadaun la’o hela, maibé Autoridade nota, menus ekipamentus kahor masa hodi apoiu traballadór sira aselera servisu hodi finaliza tuir kontratu ne’ebé iha, maske nune’e Autoridade Suku kontinua rekomenda ba parte kompaña aumenta ekipamentu ne’ebé menus hodi aselera servisu.
“Autoridade nia observasaun ka avaliasaun kompaña nia existénsia no serbisu la’o hela kona-ba fasilidade, autoridade ejize ba sira kria fasilidade kona-ba kareta boot sira (kompaña) sufisiente hela soke ba servisu ponte, saluran mak fasilidade hanesan mixer (kahor masa), tamba sira servisu fahe tamba ne’e autoridade nafatin ejize sira aumenta atu servisu lalais,” dehan Xefe Suku Loilubo.
Bazeia ba kuadru projetu estrada Loilubo, Fatumaca no Venilale hamutuk kilómetru 18 resin, kompostu pakote 3, Governu liu husi Ministériu Planementu Investimentu Estratéjiku ne’ebé lansa iha loron 17 fulan Janeiru 2025, ho periodu implementasaun projeitu fulan 12 (17-01-2025-17-01-2026), maibé to’o agora seidauk finaliza.
Orsamentu governu preve ba projetu pakote tolu ne’e hamutuk liu milões sanolu resin rua ($12,032,121.05).
Ekipa Kobertura : RCLM
