RCLM Baucau (24-10-2025)—Polisia Nasionál Timor-Leste (PNTL) iha Munisipiu Baucau ,bandu estudante finalista sira ne’ebé uza motor halo komboiu iha estrada públiku bainhira Ezame Nasionál no lokál finaliza.
Segundu komandante PNTL Munisipiu Baucau, Superintendente Asistensia Polísia Fasio de Jesus Lima hatete, estudante finalista sira tenke kumpri lei kodigu estrada númeru 6/2003, tamba ne’e apela labele halo komboiu.
Fasio akresenta, polisia deteta estudante sira halo komboiu kontra lei kodigu estrada tamba ne’e polisia sei aplika koima ba infratór sira.
“kunadu sira (finalista) halo pawai polisia nafatin impoin lei no ordem bazeia lei kodigu estrada ne’ebe polisia sei halo prevensaun la utoriza se deit halo fali komboiu depois ezame hotu,” hateten Segundu komandante PNTL Munisipiu Baucau.
Segundu komandante PNTL Munisipiu Baucau haktuir, liga ho ezame nasionál no lokal iha área juridiku Munisipiu Baucau antes ne’e parte komandu hasai ordem operasaun hodi destaka membru na’in rua ba sentru realizador eskola, hodi halo vizilansia no prevensaun asaun krime.
“Objetivu atu asegura ba ezame no karik iha problema seluk ne’ebe mosu ita prevene, akresenta Fasio.
Entertantu Superintendente Asistensia Polísia iha komandu PNTL Munisipiu Baucau kontinua apela estudante sira mantein kria unidade durante moris loro-loron iha sosiedade, hodi kontribui ba prosesu dezenvolvimentu.
Ekipa Kobertura : RCLM
