RCLM (06-02-2026)—Primeiru Ministru Kay Rala Xanana Gusmão, husu kompaña manan nain ba projeitu rehabilitasaun estrada área urbana Munisipiu Baucau, hamutuk kilometru 23, atu halo obra ne’e ho kualidade.
Iha lansamentu ne’e Primeiru Ministru Kay Rala Xanana Gusmão hateten, orsamentu ne’ebe halo ba infraestrutura estrada urbana Baucau ne’e povu nian ne’ebe sosa ho sakrifisiu oi-oin, tamba ne’e tenke jere ho diak hodi benifisia fila-fali ba povu.
“Husu ba (kompaña Jova-Vage’el) servisu ho di’ak, kualidade, kualidade la iha hau han imi, imi hatudu tiha ona maibe saida mak povu tomak ohin sai nu’udar testemuña (lansamentu estrada urbana Baucau), ohin temi ona osan povu nian jere ho diak , los duni osan ne’e la’os dehan governu ida sa’e ba osan ne’e hanesan ne’e, osan ne’e povu nian, povu mak sosa ho ran, ruin, terus, hamlaha, moras, mate hodi ne’e mak sé povu mak sosa no povu nian, halo buat ruma ba povu,” dehan Xefe Governo.
Diretor Kompaña Jova Konstruction Unipessoal Lda. José Sebastião da Silva hateten, parte kompaña kumpri orientasaun husi Primeiru Ministru, hodi halo rehabilitasaun estrada urbana Baucau ho kualidade, tamba material sira ne’ebe utiliza ba rehabilitasaun Estrada, liu husi teste laboratorium no hare estandarizaun.
Diretor Kompaña ne’e mos informa, semana oin komesa mobiliza material hodi hahú halo servisu, maibe husu komunidade afetadu sira kopera nune’e labele mosu impedementu ba projeitu ne’e hodi finaliza tuir data kontratu.
“Ohin ami asina kontratu ho governu no halo lansamentu programa tuir mai kompaña komesa mobilizasaun no halo servisu husi Nagarjo mai bundaran kota-baru, iha kontratu ne’e Ministeriu ho kompaña tinan rua, maibe hau hare antes tinan rua ami finaliza ona projeitu ne’e no kompaña mos husu ba inan-aman sira, sasan no ai-horis ruma ami servisu mak kona ami husu kolaborasaun ho ami,” Diretor Kompaña Jova Konstruction Unipessoal Lda. fo mensazem.
Autoridade Munisipal Baucau no komunidade sente kontente no agradese ba governu, tamba responde ona preokupasaun durante tinan barak estrada urbana Baucau ne’ebe aat.
”eventu ne’e (lansamentu estrada urbana) Munisipiu Baucau ho komunidade hein kl’eur, ohin mai duni,” dehan PAM Venereranda.
Entertantu, estrada urbanas Munisipi Baucau hamutuk 23 km, kompaña rua mak resposabiliza, pakote primeiru km 10 resin resposabiliza husi Kompaña Jova Konstruction Unipessoal Lda ho valor kontratu $ 4,735,021.55 no pakote segundu km 10 resin responsabiliza husi kompaña Vage’el Unipssoál Lda. valor kontratu $ 3,764,933.21 projeitu ne’e ho durasaun servisu fulan 24 (tinan-2)
Ekipa kobertura :RCLM
