RCLM (13-02-2026)—Prezidente Autoridade Munisipal Baucau preokupa estrada públiku husi diresaun área Caravela Lanud, nune’e mos diresaun Triloka ba postu administrativu Venilale maibe laiha iluminasaun.
Prezidente Autoridade Munisipal Baucau Veneranda Lemos Martins hateten, estrada públiku sira ne’ebe di’ak ona maibe laiha iluminasaun, governu presiza instala iluminasaun nune’e fo asesu movimentasaun komunidade iha tempu kalan.
“Ita hotu hamutuk lobi ida ba Ministru, ami estrada kapas ona maibe ami presiza ahi iha estrada sira bele lakan hahu husi Caravela mai to’o Caisido tama to’o Aeroportu, no mos husi Trikola ba Venilale ami presiza ahi, tamba komunidade barak hela estrada ninin maibe ahi la lakan, ida ne’e perigu teb-tebes ba ema la’o ain sira,” PAM Baucau hato’o rekomendasaun liu husi nia intervensaun serimonia lansamentu hatur fatuk dahuluk konstrusaun merkadu Munisipal Baucau iha Tua-nau kinta (12-02-2026).
Hatan ba preokupasaun ne’e, Vise Primeiru Ministru, Ministru Kordenador Asuntu Sosial no Ministru Dezenvolvimentu Rural no Habitasaun Mariano Sabino hateten, governu planeia komesa tinan ne’e instala iluminasaun iha estrada públiku ne’ebé di’ak ona husi Manatutu mai Munisipiu Baucau, to’o Laivai área Munisipiu Lautem.
“Prezidente Autoridade ko’alia kona ba lampu iha Estrada, parese másimu to’o marsu laran komesa hahú husi Manatutu lampu ba estrada komesa book ona, nune’e estrada ne’ebé di’ak ne’e kalan ita la’o avontade”
Entertantu planu governu sentral prioritiza instala iluminasaun estrada públiku, hahu husi Munisipiu Manatutu mai Baucau no kontinua to’o Laivai faze primeiru, tamba estrada kondisaun di’ak ona.
Ekipa Kobertura : RCLM
