RCLM Baucau (19-12-2025)–Negosiante preokupa laiha bee-moos iha Postu Administrativu Venilale Munisípiu Baucau, atu utiliza iha sanitasaun no nesesidade merkadu nian.
Negosiante Elsa do Rego hateten, bee-moos nesesidade bázika importante mabe iha merkadu Venilale laiha atu utiliza iha haris fatin, tamba ne’e husu ba autoridade Postu Administrativu no BTL.Ep buka alternativa halo kanalizasaun.
“Iha merkadu bee laiha ami lori husi uma mai, atu uza haris fatin ami ba de’it dut laran ami husu nain ulun sira ajuda bee mai ami,” negosiante husi suku Fatulia husu.
Kordenador Gestaun Merkadu Postu Administrativu Venilale Francelino Amaral Guterres rekoñese durante ne’e iha merkadu Venilale hasoru dejafius falta bee-moos, maibe servisu saneamentu no funsionariu administrasaun postu halo ke bee posu konsege hetan ona atu fornese mos ba merkadu, maibe presiza apoiu fasilidade hanesan profil no mageira husi parte relevante.
”Ami hato’o ona servisu agua no saneamentu (SAS) no postu Venilale sira ke de’it manual (bee posu) hetan ona atu fornese mos ba merkadu, entaun ami husu ba Ministeriu prepara profil rua ka tolu no mangeira tamba ami nia profil iha merkadu uza tinan barak at ona,” Kordenador Gestaun Merkadu Venilale rekomenda.
Administrador Postu Administrativu Venilale José Freitas Boavida hateten, preokupasun negosiante kona ba bee-moos tekniku SAS no funsionariu administrasaun sei distribui bee posu ne’ebe kee iha resintu administrasaun.
”Iha duni alterantivu bee posu ne’ebé ita ke iha postu bele faselita oituan ba nesesidade merkadu nian, maibe atu fornese depende ba servisu ekipa husi gestaun merkadu no SAS postu halo jestaun,” dehan APA Venilale.
Enkuantu Autoridade Postu ne’e konklui parte BTL mos loke ona tenderizasaun projeitu kanalizasaun bee-moos ba postu venilale no kompaña sira submete ona dokumentus tenderizasaun, maibe sei iha faze verifikasaun, bainhira remata sei anunsia kompaña ne’ebé selesionadu hodi implementa projeitu.
Ekipa kobertura : RCLM
