RCLM Baucau (28-11-2025)—Natár potensiál iha área suku Buruma Postu Administrativu Baucau vila Munisipiu Baucau, balun abandona tamba problema laiha bee no irigasaun.
Komunidade Agrikultór Mário Gorje Maria hateten, maske sira iha vontade atu halo natar maibé irigasaun no bee laiha , tamba ne’e rekomenda ba governu liu-liu Ministériu Agrikultura Pekuaria Peskas no Floresta atu rezolve problema ne’e, nune’e sira bele reativa fali sira nia natar ne’ebé abandona.
“Ami nia natar labele halo tinan-tinan tamba bee mak la permanente, ita depende ba irigasaun ka bee dalan di’ak foin bele halo bee la mai ita la halo ka para, ami hanesan natar nain hakarak halo fila fali natar maibe laiha ita laiha vontade atu servisu, bainhira bee lansar ona ita natar nain mos lakohi atu abandona ita nia natar,” dehan Komunidade Agrikultor Mario.
Iha sorin seluk Xefe suku Buruma Liborio dos Santos Freitas afirma, natar iha área suku Buruma labele funsiona hotu hamutuk hektares 100 resin, tamba durante ne’e dependente ba bee-matan Wailia maibé debitu ki’ik kauza husi mudansa klimátika.
“Ne’e tinan tolu ka hat mak kona fali iha ne’ebá, too tempu atu halo ita labele halo hotu tamba bee labele kobre natar sira ne’e tamba kondisõens bee ne’ebe nia debit Ki’ik, dala ruma natar sira ne’e Ita labele halo, maibe Natar hotu-hotu ne’ebé iha potensial kuandu bee mak iha halo hotu nia fo rezultadu koileta ne’ebé di’ak,” hateten Lideransa Komunitáriu Buruma.
Maske tinan barak natar balun abandona maibé Autoridade Buruma ne’e iha esperansa, konstrusaun irigasaun Modo buti ne’ebé dadaun la’o hela bainhira finaliza bele fornese bee ba natar iha suku Buruma tomak no natar nain bele reativa hikas.
“Ami nia mehi ba oin irigasaun ne’ebe agora dadaun (irigasaun Modo Buti) ne’ebé halo hela konstrusaun, ba oin bele kobre to’o iha ne’ebé no bele halo fali hanesan uluk agrikultor sira halai natar troka malu, tinan ida sorin halo sorin para, maibe depedenti nafatin ba bee matan mak sei labele halo tamba debit bee menus”nia konklui.
Entertantu, natar hektares atus ida labele funsiona kada tinan iha área suku Buruma, nain balun husi suku Bahu no Caibada Makasae.
Ekipa Kobertura: RCLM
