RCLM Baucau (06-11-2025)—Munisipiu Baucau sei komemora loron Nasionál juventude ba dala-20 tinan ne’e, inklui akontesementu Masakre Santa Kruz ba dala-34 ne’ebe selebra iha loron 12 fulan novembru iha kada Postu Administrativu.
Diretor Ezekutivu Sentru Juventude Munisipiu Baucau Manuel de Carvalho Marques hateten, relasiona loron Nasional Juventude no akontesementu Masakre Santa Kruz ne’ebe atu selebra iha loron 12 fulan novembru ne’e komesa halo prepasaun inisiu fó koñesementu ba Autoridade munisipal, alende ne’e SJMB kria ona komisaun organizador kada Postu Administrativu, no trasa ona planu atividade ne’ebe sei priense ba loron importante ne’e.
Manuel akresenta, Postu hitu atividade ne’ebe sei realiza mak hanesan limpeija jerál, semináriu, publika video dokumentariu akontesementu trajendia Masakre Santa Kruz iha tinan 1991, misa agradesementu, marsa hodi lori ai-funan no lilin ba semiteriu no momentu saudozu no saudoza sira nian, maibe iha Postu Baucau vila sei konsentra iha Munisipiu no iha konsertu múzika hodi anima komunidade.
“Esforus sira sentru juventude ho organizasaun voluntariu sira halo atu valoriza luta sira joven sira uluk kontribui ona ohin loron ita ukun rasik-an,” hateten Diretór Ezekutivu SJMB ba RCLM iha nia kna’ar fatin Vila Nova kinta feira ne’e.
Nia hatutan SJMB hetan apoiu orsamentu husi Ministériu JuventudenDesportu Arte no Kultura (MJDAK), Autoridade Munisípál, Dioseze Baucau no empreza balun hamutuk dolar amerikanu rihun neen, atus haat lima nolu ($6,450.00), aloka ba kada Postu ida dolar Amerikanu atus neen ( 600,00) no Baucau vila mak montante rihun ida atus hitu lima nolu ($ 1,750,00).
Entertantu tema jeral komemorasaun loron Nasionál Juventude ba dala-20 no akontesementu Masakre ba dala-34 tinan ida ne’e mak “Hau Timoroan Orgullu Ho Hau Nia Nasaun”.
Ekipa Kobertura : RCLM
