RCLM Baucau (24-11-2025)—Organizasaun Non Governamentál Internasionál MARY MAKCILLOP Today (MMT) husi Austrália, apoia fasilidade aprendisazem dijitál ba Pre-eskolár tolu iha Rejiaun Leste hanesan Munisípiu Lautém, Viqueque no Baucau.
Gerenete programa MARY MAKCILLOP Today Agostinha Ximenes hateten, fasilidade aprendisazem dijitál apoia ba Pre-eskolár tolu iha Rejiaun Leste nu’udar programa pilotu, atu manorin sira utiliza implementa aplikasaun” Hanorin Aprende” (HAAP) tamba durante formasaun loron lima hetan ona teoria.
”Ita apoia inísia hamutuk ho Ministériu Edukasaun tamba la apoia manorin nain sira labele utiliza ka ko’alia de’it laiha asaun, entaun ita iha Ministériu Edukasaun nian kotuk nafatin apoia sasan hirak ne’e suporta manorin nain sira no labarik sira iha sala aula ba prosesu aprendisazem di’ak liu,” Gerenete programa MARY MAKCILLOP Today hateten ba Jornalista iha enseramentu formasaun Rejionál Aplikativu “HAAP” ba Inspetór, Inspetora no Manorin ne’ebé realiza iha Salaun EBC 03 Vila Nova Baucau.
Fatin hanesan Diretór Servisu Munisipál Edukasaun Baucau Afonso dos Santos da Costa, agradese ba MARY MACKILLOP Today tamba, suporta ona Ministeriu Edukasaun implementa programa edukasaun teknolójia iha Pre-eskolár.
”Programa ida ke importante teb-tebes, hau la hatene, seluk ho hau dala ruma ita hanoin negativu deit ba teknolójia ida ne’e, liu-liu telemovel, ita nia hanoin ka imajinasaun no inan aman barak ko’alia influénsia sira impaktu negativu hatudu ne’e husi telemovél ne’ebé hatudu tan ba labarik Pre-Eskolar aat liu mais ninia resposta sira liu husi fatin bar-barak, depois parte manager MARY MACKILLOP temi tiha ona atu tau iha ninia aplikasaun sira, ida ne’e mak lori ita atu hetan ninia pozitivu husi telemovel ne’e” dehan Afonso.
Reprezentante Prezidente Autoridade Munisípiu Baucau Maria Celestina Viegas, espera manorin Pre-eskolár eskola tolu tuir ona formasaun aplikativu” HAAP” sei implementa matenek no esperiensia ba eskola sira ne’ebé hakna’ar an ba.
”Ami tau esperansa bo’ot ba hau nia manorin sira bele hanorin ita nia oan sira sai sidadaun ne’ebe diak iha futuru hahu husi ohin ba oin liu husi aplikasaun dijital ne’ebe ita boot sira Aprende durante semana ida” dehan Maria.
Kordenadora Pre-eskolár Maxtal husi Viqueque Francisca de Araújo sente orgullu partisipa formasaun aplikasaun “Hanorin Aprende” (HAAP) no hetan mos fasilidade aprendisazem dijitál husi MARY MAKCILLOP Today tamba ne’e kompremitidu utiliza kuidadu iha prosesu aprendisazem.
”Tuir formaun (aplikativu HAAP) kontente tebes no importante tebes ba ami atu implementa iha terenu no labarik fasil liu aprende, ami mos sei kuidadu sasán sira ne’e utiliza bá tinan naruk,” dehan Francisca.
Entretantu iha Rejiaun Leste programa pilotu implementa aplikativu “Hanorin Aprende (HAAP) mak Pre-eskolár Bercoli-Venilale Munisípiu Baucau, Pre-eskolár Moris Foun Lospalos Munisípiu Lautém no Pre-eskolár Maxtal Viqueque. Ekipamentus Edukativu teknolójia MARY MACKKILLOP Today apoia hanesan Projetór EBX600, Foun tomada 10 metru, Tableta, Laser Printer no seluk tan.
Alende ne’e, manorin Pre-eskolár no inspetór inspetora husi Munisípiu tolu hamutuk 12 simu sertfikadu apresiasaun husi MARY MACKKILLOP Today.
Ekipa Kobertura : RCLM
