RCLM Baucau (19-01-2026)—Governu liu husi Ministériu Agrikultura Pekuaria Peskas no Floresta (MAPPF), segunda ne’e entrega tan fasilidade modernu ba Autoridade Munisipál Baucau hodi apoia ba komunidade agrikultor servisu iha baze.
Ministru Agrikultura Pekuaria Peskas no Floresta Marcos da Crúz hateten, nasaun Timor-Leste presiza ai-han autósufisiente tamba ne’e, nonu governu lideradu husi Xanana Gusmão kontinua prioriza infraestrutura setór agrikultura nian, hodi konstrui irigasaun inklui moderniza servisu agrikultura nian nune’e Ministeriu esforsu kontinua apoia fasilidade ba autoridade Munisipiu Baucau, hodi ajuda povu agrikultór servisu lalais no bele hasa’e rendimentu produsaun produtu lokál.
“Agora iha kontinua iha nonu Governu ita la’os de’it apoiu traktór hodi prepara rai, maibe ita komesa ajuda makina sira ba ita nia agrikultór sira kuda hare no kua hare, tamba ita hotu hatene servisu iha setór ida ne’e (agrikultura) todan, ita sira servisu iha AC laran de’it dalaruma ladun produtivu satan sira servisu iha loron, taho no udan laran, servisu sira ne’e todan los,” hateten Marcos iha resintu Administrasaun Munisípál vila Nova Baucau.
Governante ne’e afirma, komunidade agrikultór lahetan apoiu fasilidade agrikultura modernu no kontinua utiliza ekipamentus tradiosionál ai-suak, enxada no katana halo natar no toos hanesan iha tempu okupasaun nia rezultadu sei la aumenta.
“Meius ida ita tenke fó apoiu kuda hare oinsá, tamba ita agrikultor nia oan no iha natar kuda hare buat todan boot ida no barak ita lakon osan boot iha prosesu kuda hare ne’e, ita iha natar fila tiha prepara atu kuda hare ita selu fali labarik sira dolár lima kada pesoa ida loron ida no hektares ida bele loron rua osan sai hotu ba traballador, depois kua lakonsege lori sai husi natar laran udan monu rai estraga tamba ne’e iha tan akipmentu atraladu iha trator kotuk nia funsaun ajuda lori sai agrikultor sira nia produtu iha natar laran,” nia esplika
Prezidente Autoridade Munisipiu Baucau Veneranda Eurico Lemos Martins agradese ba governu tamba tau atensaun boot munisipiu hotu liu-liu Baucau, hodi apoia fasilidade Agrikultor modernu maibe husu Agrikultora sira tenke kuiadu hodi fó rezultadu aumenta produsaun.
“Liu-liu munisipiu ne’ebé tinan kotuk ita simu traktores agora mos simu traktor ita agradese tamba nonu governu nia prioridade no atensaun ba Agrikultura, tamba ne’e hanesan Primeiru Ministru hateten ita la’os agradese ba governu tamba ita simu sasan maibe ita nia agradesementu ne’e tenke transforma atu halo produsaun, bainhira ita simu makina sira ne’e uza ho didi’ak ita hasa’e produsaun ida ne’e mak ita agradese,” dehan PAM Baucau.
Fasilidade agrikultora modernu ne’ebé Ministériu Agrikultura Pekuaria Peskas no Floresta entrega ba Autoridade Baucau atu ajuda komunidade agrikultores sira iha baze kompostu traktor boot no mediu unidade rua (2) ho nia implemen Saroa ida (1), rotáriu rua (2), atraladu ida (1), makina kuda hare unidade sanolu resin rua (12) ho raga viveirus hamutuk rihun tolu atus neen (3.600), makina kua hare unidade lima (5), maibe antes ne’e entrega uluk unidade rua (2) iha suku Seiçal no entrega aumenta unidade tolu (3) ne’ebé hetan bensaun husi padre Salvador Gaspar Florindo.
Ekipa Kobertura : RCLM
