RCLM (08-01-2026)—Ministériu Agrikultura Pekuaria Peskas no Floresta (MAPPF), Sosa fini hare variedade Nakroma no Impare hamutuk toneladas rua nolu resin haat (24), hodi apoia bá Agrikultór sira iha Postu Administrativu ualu iha Munisípiu Baucau.
Diretór Servisu Munisipál Agrikultura Pekuaria Peskas Baucau, Agostinho Ximenes hateten, polítika governu liu-liu Ministériu Agrikultura Pekuaria Peskas no Floresta apoiu fini hare ba Agrikultor kada pesoál no grupu sira ne’ebé laiha fini atu kuda ba natar iha epoka tinan ne’e.
“Ministériu Agrikultura apoiu fini ba Agrikultor tamba hare ba gagal panel, balun fini laiha tamba mudansa klimátika udan been kona, fini la moris entaun Ministériu apoiu ba Agrikultor balun individuál no balun grupu,”dehan Agostinho ba RCLM iha nia kna’ar fatin Vila Nova kinta ne’e.
Diretór servisu Munisípál Agrikultura Baucau relata, fini hare distribui ba Postu Administrativu ualu kompostu postu Baucau vila hamutuk tonelada 6,500 sei kuda natar hektares 300, Baguia tonelada 2 kuda natar 133 hektares, Laga tonelada 3 kuda natar 200 hektares, Matebian 500 kilograma kuda natar 33 hektares.
Venilale tonelada 6 kuda iha natar 300 hektares, Quelicai Antigu kilograma 500 kuda natar 33 haktares, Quelicai tonelada 1,500 sei kuda iha natar 100 hektares, Vemasse tonelada 4 kuda natar 266 hektares.
“Ami diresaun Ministériu Agrikultura rekomenda ba agrikultór Baucau laran tomak katak, Ministériu Agrikultura husi nonu governu fó ajuda ona fini labele depedensia nafatin, maibé habarak iha tinan oin mai,” nia fó liamenon.
Dadaun ne’e Servisu Munisipál Agrikultura Baucau distribui ona ba Postu Administrativu Quelicai Antigu no Venilale no sei kontinua ba Postu Administrativu neen seluk ne’ebé mak seidauk.
Ekipa Kobertura: RCLM
