RCLM Baucau (06/11/2025)—Hahu husi fulan Setembru to’o mai fulan Outubru tinan ne’e, Dirasaun Munisipal Transporte no Komunikasaun Baucau, faselita deit Karta Kondusaun provizoriu ba Motorista sira ne’ebe liu ona teste, hodi utuliza bainhira Viagem tamba dau-daun ne’e Makina printu Karta kondusaun original avaria.
Diretur Dirasaun Munisipal Transporte no Komunikasaun Baucau, Mariano Pinto da Costa hateten, relasiona ho makina ne’ebe avaria parte Dirasaun Transporte Baucau halo ona intrervensaun hodi lori ba iha dirasaun Nasional atu halo manutensaun, maibe to’o agora makina refere seida’uk diak, tamba nia sasan sira seida’uk iha.
Tamba ne’e sujere ba Dirasaun Nasional hodi aselera lalais manutensaun ba makina, hodi bele produs fali karta kondusaun original ba motorista sira.
“Tamba ita nia makina avaria entaun ami agora dadaun uza fali karta kondusaun provizoriu wainhira kliente sira mai tes motor ga kareta kuandu passa ona ami fo karta kondusaun provizoriu ba sira no mos sira ne’ebe mak halo renovasaun mos hanesan sira kuandu selu ona iha banku ami pasa fali karta kondusaun provizoriu ba sira hodi hein ita nia makina diak ona mak sira mai fali foti karta kondusaun original, ninia impaktu mak kuandu suratahan sira lori, agora dadaun tempu udan sira tau iha kartera mak dodok ida ne’e prejudika ba sira sira nia viagem tamba ne’e hato’o ona iha dirasaun jeral oinsa para aselera lalais manutensuan makina refere iha tempu badak, sira bele mai fali foti sira karta kondusaun Original.
Motorista Joana da Costa Correia sente triste, tamba dadaun ne’e Dirasaun Munisipal Transporte no Komunikasaun Baucau faselita deit karta kondusaun provizorio, hodi bele fo impaktu bainhira hala’o viagem tamba tempu udan.
“Hau sente triste tamba durante ne’e ami uza karta kondusaun provizoriu deit ami sente triste tamba wainhira kona udan been dodok antaun ami labele uza tamba ne’e hau rekomenda ba governu se bele produs karta kondusaun original atu nune’e ami bele uza ba tempu naruk” motorista Joana da Costa hato’o preokupasaun.
Alende ida ne’e Motorista Sonia Pintu Boavida reforsa katak, karta kondusaun provizoriu labele utuliza ba tempu naruk tamba fasil atu les no dodok.
“Hau sente triste oituan tamba dadaun ne’e la iha karta kondusaun original, agora sei iha provizorio tamba agora mos tempu udan kuandu ita viagen ba fatin ruma udan kona bele dodok no estraga ,ita uza orizinal para tempu naruk, atu husu deit ba ita nia governu ida ne’e atu tau matan ba ida ne’e tamba ida ne’e importante tebes ba ami motorista sira” hateten motorista Sonia Pintu Boavida.
Entertantu karta Kondusaun Original iha Dirasaun Munisipal Transporte No Komunikasaun Baucau dadaun ne’e sufsiente hela hodi bele faselita ba motorista sira.
Motorista sira ne’ebe hetan karta kondusaun provizoriu hamutuk nain lima nolu resin ona, enkuantu hahu husi fulan Janeiru to’o mai fulan setembru Dirasaun Munisipal Transporte no Komunikasaun Baucau faselita ona karta kondusaun original hamutuk rihun rua atus ualu resin ba motorista sira.
Ekipa Kobertura : RCLM
