RCLM Baucau (02/03/2026)—Veteranus hamutuk ho Autoridade Sivil no seguransa, inklui estudante sira selebra misa agradesementu ba loron Veteranus nian iha igreija Catedral Diocese Baucau, hodi komemora loron istoriku Veteranus nian, hanesan momentu solene atu fo onra no rekoñesementu ba sira nia sakrefisiu ba luta libertasaun nasaun nian.
Iha Misa Agradesementu Amu selebrante Padre Manuel Ximenes SDB, husu ba Veteranus sira atu labele halo impedementu ba prosesu Dezenvolvimentu iha Timor Leste, tamba papel Veteranus nian laos atu luta ba nia an, maibe luta ba Povo nia moris diak.
Padre Manuel hatutan, Veteranu sira presija kuda espiritu unidade no fraternidade mak sai hanesan save ida hodi luta ba dezenvolvimentu.
“Veteranus sira presija servisu hamutuk no kolabora hamutuk ho estadu no uma kreda, atu defende ba kultura maibe labele sai impedementu ba dezenvolvimentu iha rai ida ne’e tamba sira nia luta, primeiru sai airin ba nasaun no ikus mai sira tenke sai ema ne’ebe kolabora ba dezenvolvimentu”. Dehan Padre Manuel Ximenes SDB ba jornalista sira iha Igreija Katedral Diocese Baucau Segunda, 02/03/2026
Sekretariu Servisu Munisipal Konsellu Kombatentes Libertasaun Nasional Baucau, Roberto Carlos da Silva hateten, agradese tebes tamba ema hotu nia prejensa mak dignifika asuwain sira ne’ebe mak mate ba rai Timor Leste.
“Mai ita hamutuk hodi husik hela minutu 1 fo onra no dignifika asuwain sira neebe mate ba rai ida ne’e”. Haktuir Roberto
Prezidente Autoridade Munisipiu Baucau Veneranda Lemos Hateten, husu ba Veteranu sira nafatin apoio ba governu local, atu nune’e prosesu dezenvolvimentu labele iha perturbasaun.
“Husu Veteranu sira nia apoio ba governu local, no ajuda ami atu dezenvolvimentu ne’e labele iha perturbasaun, tamba bainhira governo lokal se la atinji prosesu dezenvolvimentu bainhira la iha Veteranu no Veterana”. Hatete Veneranda
Depois de Misa Agradesementu Veteranus hamutuk Autoridade sivil no seguransa inkui komunidade sira, ba kare aifunan iha Fatin ne’ebe identifika mak hanesan Restus Mortais Saudozu Sahe no Saudoza Wewe, Subar fatin David Alex Daitula iha Tasi ibun, Jardin dos Herois Soba Laga, Jardin dos Erois Dubuwai postu Matebian, Semiteriu Lakudala, Restus Motais Osowariu Fatumaka, no semiteriu Luidua Buibau.
Ekipa Kobertura : RCLM
