RCLM Baucau (07/01/2026)—Lixu palstiku importasaun hanesan aqua mamuk, dos mamuk, plastiku, bidon mamuk inklui foer sira seluk ne’ebe naklekar iha terminal Vila Nova Baucau tamba ekipa saneamentu Baucau seidauk hamos.
Motorista Elio Leopoldo Ximenes hateten, lixu ne’ebe namkare iha Terminal Baucau imagen ne’ebe ladiak, tamba foer sira dodok no iis fo impaktu ba pasajeirus inklui motorista sira.
“Hau sente triste tebes wainhira hare lixu nakonu Terminal Baucau fo impaktu ba mai pasajeiros sira no mos ba kondutor sira, tamba wainhira lixu iis hanesan ne’e fo impaktu ba ami nia saúde, ida ne’e mos imagen ne’ebe la diak ba ami, ami husu ba Autoridade Munisipiu Baucau atendimentu lalais lixu ne’ebe ke fakar iha Terminal Baucau ne’e raut no lori tiha ba fatin ne’ebe seguru tamba ida ne’e ema barak mak hein transporte iha ne’e foer iis hanesan ne’e ladun seguru ba ema”. Dehan Motorista Elio ba jornalista RCLM Baucau iha Terminal Vila Nova Quarta feira, 07/01/2026
Entertantu Pasajeiros Domingas Soares reforsa, sente triste tamba foer sira ne’e kuaze semana rua ona parte saneamentu sira seida’uk raut.
“Hau sente triste tamba hare ba lixu nakonu iha Terminal lalar hobur makas, husu ba Autoridade mai raut sampa para Terminal laran mos uituan tamba lalar barak hobur tamba kuaze semana rua ona la mai raut, foer nakonu terminal tamba ne’e mak hau triste”. Hateten Domingas
Hatan ba preokupasaun ne’e, Ofisial Saneamentu Munisipiu Baucau Natalino de Jesus Piadade Sarmento hateten, relasiona feriadu ba Natal no tinan foun halo lixu nakonu iha fatin lixu sira, maibe segunda feira semana ne’e pessoal saneamentu sira hahu servisu fali iha ne’ebe tau perioridade ba dala portukulu sira mos hotu hafoin kontinua kedas ba iha Terminal nian.
“Horseik ami tama maibe seida’uk hotu tamba nia volume barak, ohin ami foti fila fali iha dalan portokulu nian ora-ooras tan ida ne’e hotu kontinua kedaz ba Terminal ami iha preokupasaun mak ne’e ami menus rekursu humanu, kareta rua ida iha vila antiga ida iha vila nova ida ne’e mos hanesan preokupasaun ida, kuandu nia ba fakar mai tarde ou dada oras balun ninian ami labele deskobre maibe laos tan ida ne’e mak ami labele foti, maibe tamba feriadu ne’ebe naruk, maibe tempu badak nia laran ami promete sei mos”. Hateten Ofisial Saneamentu
Pessoal saneamentu ne’ebe servisu lor-loron hamutuk ema nain rua nolu, kompostu nain sanolu kobre iha Vila Antiga no Nain sanolu kobre vila Nova Baucau inklui Kareta Vaskolante tula foer rua.
Ekipa Kobertura : RCLM
