RCLM (03-02-2026)—Lideransa lokál suku Caibada Postu Administrativu Baucau vila Munisipiu Baucau, preokupa kazu dengue sa’e makás iha inisíu tinan ne’e no fó risku ba vida komunidade nian, tamba ne’e husu Minsteriu Saúde (MS) halo intervensaun emidiata.
Xefe Suku Caibada Cosme da Costa Lopes hateten, medidas prevensaun ba kazu dengue Ministeriu presiza apoia medikamentus másimu ba fasilidade saúde husi Munisipiu to’o Postu no Suku nune’e pesoál Saúde halo prevensaun ba kazu dengue.
“Agora dadaun tempu udan moras sira ne’e (dengue) afeta tebes ba komunidade entaun nu’udar autoridade ejize Ministériu Saúde ajuda faselita ai-moruk husi nasionál mai iha ne’e (Munisipiu) atu nune’e Saúde sira tun ba prevene,” Xefe Suku Caibada hato’o rekomendasaun ne’e iha resintu Administrasaun Vila Nova.
Hatan ba rekomendasaun ne’e, Xefe Departamentu Programa Saúde, Servisu Munisipal Saúde Baucau, Maria Cândida dos Reis hateten, medikamentus ba kazu dengue stok sufisiente tamba antes ne’e hato’o pedidu ba Ministeriu Saúde no apoia ona hodi halo prevensaun moras dengue.
“Kona ba stok abate ho balation ami sufisiente no tinan-tinan ami halo pedidu no halo abate fulan neen antes udan monu rai ami halo prevensaun, fomigasaun ne’e kazu iha ami identifika ona pozitivu moras dengue mak ita halo fomigasaun tamba, ai-moruk ida halo fomigasaun ita rega bei-beik dalaruma susuk sai rezistesnai ba malation ne’e,” konfirma Maria.
Entertantu fulan janeiru tinan ne’e Servisu Munisipal Saúde Baucau liu husi departamentu programa Saúde rejistu komunidade maiória tinan 1-15 sofre moras dengue hamutuk na’in-43 ne’ebé deteta iha sentru saúde Baguia na’in-1, Sentru Saúde Laga na’in-1, Sentru Saúde Quelicai na’in-2, Sentru Saúde Venilale na’in-13, Sentru Saúde Osoqueli Vemsse na’in-4, Sentru Saúde Ossoqueli na’in-11 no Sentru Saúde Uailili na’in 11.
Ekipa Kobertura : RCLM
