RCLM Baucau (10-12-2025)—Lideransa komunitáriu Abafala agradese ba konsellu konsultivu Munisipál Baucau nia desizaun liu husi votasaun sekreta, tamba rezolve ona problema komunidade suku Abafala ne’ebé lakohi atu hamutuk ho Postu Administrativu Quelicai Antigu.
Xefe suku Abafala Agapito dos Reis haktuir durante tinan ida ho balun komunidade hasoru dejafius atu halo dokumentus importante, tanba suku Abafala rejista hamutuk ho Postu Administrativu Quelicai Antigu, maibé komunidade lakohi no hakarak mantein Postu Administrativu Quelicai.
”Agradese ba Prezidente konsellu konsultivu ho estrutura no membru Baucau nian tomak, ne’ebé ohin fó ona rezultadu pozitivu ba komunidade Abafala nia ejizensia, halo votasaun rezultadu nafatin hamutuk ho Postu Administrativu Quelicai, bele responde ona preokupasaun Abafala nia durante tinan ida ho balun kona-ba trata dokumentus importante,” dehan Xefe Suku Abafala ba Jornalista sira hafoin remata enkontru KKM iha Salaun Apuramentu Munisípiu Baucau tersa-feira (09-12-2025).
Prezidente Konsellu Kordenasun Munisípál Baucau Veneranda Eurico Lemos Martins hateten, durante tinan ida ho balun Autoridade Munisipál no reprezentante governu sentrál liu-liu Diretór jerál Desentralizasaun Administrativa lokál halo komunikasaun ho komunidade suku rua, hanesan Abafala no Uaitame atu deside ba Postu Administrativu Quelicai Antigu ka Postu Administrativu Quelicai, maibé laiha rezultadu tamba ne’e Autoridade Munisipiu lori asuntu ne’e iha KKM foin deside liu husi votasaun konsege fó rezultadu.
”Autoridsde Munisípiu sente polemika ida ne’e lori mai konsellu konsultivu Munisipál tamba konsellu ida ne’e mak as liu no bele foti desizaun ba hotu-hotu nia hakarak, ohin dader tama ami husu kedas halo aprezentasaun ba kondisaun husi suku rua ne’e ninian ba postu rua Quelicai Antigu nomos Quelicai, membru konsellu hot-hotu konkorda hodi hatudu nia votus ba responsabilidade suku rua ne’e em fim rezultadu sai mai suku Uaitame ba Postu Administrativu Quelicai Antigu hamutuk 33 votus, nune’e mós ba suku Abafala ba Postu Quelicai ho númeru votus 33,” dehan Veneranda.
Prezidente Autoridade Munisipiu Baucau hatutan, prosesu ne’e demokrátika laiha intervensaun ruma maibé konsiensia husi membru konsellu konsultivu Munisipál mak fó votus, tamba ne’e rezultadu konsellu konsultivu Munisipál autoridade munisipiu sei relata rezultadu ba Ministru Administrasaun Estatál.
”Aseita no la aseita ne’e normál hanesan bainhira ita halo votasaun ba eleisaun sira ema barak la konkorda maibe votasaun maiória mak deside importante prosesu hotu demokrátiku, ita laiha prosesu ida intimidasaun ba ema, maibé lakonkorda dalan legál iha,” PAM konklui.
Entretantu, plenaria orgaun konsellu konsultivu ne’e hola parte husi Prezidente Autoridade Munisipiu ho estrutura, xefe suku 62, sosiedade sivil, intelekutál, relijiozu.
Ekipa Kobertura : RCLM
