RCLM (17-02-2026)—Governu liu husi Ministériu Obras Públika presiza konstrui ponte iha mota Samalari, Postu Administrativu Baucau vila, hodi fó asesu movimentu komunidade.
Komunidade suku Samalari Postu Baucau vila Justinho Francisco Maria hateten, dadaun ne’e laiha ponte, tempu udan korente mota boot susar komunidade sira atu ultrapasa, tamba ne’e husu Ministériu Obras Públika hari’i ponte hodi faselita sira nia movimentasaun.
“Ami ejize halo ponte tamba laiha ponte difisil tebes ba mota sorin, no ameasa ba ami nia vida, maibé ida ne’e mak kondisaun real ami hasoru,” dehan komunidade Samalari.
Xefe Aldeia Samalari Estanisilão Fraga Ximenes haktuir, tempu udan korente mota Samalari boot lori ona sidadaun na’in-tolu no na’in ida to’o lakon vida, tamba laiha ponte atu faselita sira nia movimentu asesu ba fasilidade Saúde, eskola, merkadu no fasilidade públiku seluk.
Nia dehan atu konstrui ponte, konsellu suku hato’o ona preokupasaun ne’e ba Ministeriu kompetente, maibe to’o agora seidauk fó resposta.
“Ami dala barak hato’o ona ba Ministériu kompete maibé seida’uk iha finalidade ka rezultadu, tamba ne’e Ministeriu kompetente bele krik responde ami nia halerik sira, liu-liu hari’i Postu ponte,” Xefe Aldeia Samalari rekomenda.
Rekorda fali katak, iha loron 06 Fevereiru halo lansamentu rehabilitasaun estrada urbana Baucau vila, Prezidente Autoridade Munisipiu Baucau Veneranda Eurico Lemos Martins mos aprezenta dadus ba Governu sentrál liu-liu Ministériu Obras Públiku, hodi trasa planu futuru konstrui ponte hamutuk 30 iha mota, hodi faselita movimentasaun tamba mota hirak ne’e nia luan liu metru 10, no Autoridade Munisipiu Baucau liu husi Programa Dezenvolvimentu Inegradu Munisipál (PDIM) no Programa Nasionál Dezenvolvimentu Suku (PNDS) orsamentu ki’ik hodi konstrui ponte.
Ekipa Kobertura : RCLM
