RCLM-Baucau (12-11-2025)—Juventude husi organizasaun oioin iha Postu Administrativu Baucau vila tersa ne’e realiza seminariu, hodi komemora loron nasional juventude ba dala-20 inklui akontesementu Masakre Santa Kruz ba dala-34 tinan ne’e ho tema “Hau Orgullu Ho Hau Nia Nasaun”.
Prezidente komisaun Organizador Manuel Camilo Pires hateten, objetivu husi seminariu ne’e atu refeleta istoria akontesementu Masakre Santa Kruz 12 novembru 1991 no komemorasaun loron nasional juventude, no enkoraja joven sira moris iha era ukun an presiza hatutan juventude rezistensia sira nia luta atu kapasita an no kria unidade.
“Juventude uluk mai ho lian no asaun no ida la’os kestaun tamba partidu, maibe hamrik iha fileira ida hodi defende ita nia rain, entaun juventude agora iha ona liberdade ita presiza investe iha setor edukasaun no setor oi-oin hodi lori ita nia nasaun ba oin, tamba hanesan deve hela tusan juventude uluk halo entaun ita joven agora presia fó liman bá malu hodi kria pás no estabilidade ba ita nia rai espesial Munisipiu Baucau,” dehan Manuel iha Salasaun Apuramentu Administrasaun Munisipal tersa (11-11-2025).
Iha abertura seminariu Prezidente Autoridade Munisipiu Baucau Veneranda Eurico Marques Lemos Martins husu ba estudante no juventude iha Munisipiu Baucau estuda makas, hodi hodi dezenvolve nasaun Timor-Leste.
“Ita komemora 12 novembru ho kualidade no espiritu luta ninian atu ita kontinuador, ba juventude sira hotu prepara-an hanesan estudante atu sai kontinuador ba dezenvolvimentu,” dehan Prezidente Autoridade Baucau.
Estudante husi eskola sekundariu Sagrada Coração de Jesus Vila Nova Baucau Celma do Rosario da Costa Silva apresia atvidade seminariu ne’e, tamba orador sira bele konta istoria envolvimentu juventude sira nia iha akontesementu Masakre Santa Kruz 12 novembru 1991.
Estudante ne’e kompromete estuda makás hodi hatutan juventude rezistensia sira nia luta, hodi kontribui ba prosesu dezenvolvimentu.
“Hanesan jerasaun foun hakarak hatutan nafatin saida mak ita nia maun, bin sira halo ami kontinua espera lori nasaun ne’e ba oin,” hateten Celma.
Entertantu iha seminariu Loron Nasional Juventude no Masakre Santa Kruz ne’ebé realiza iha Postu Administrativu Baucau vila hola parte husi eskola sekundariu publiku no privada hamutuk hitu hanesan eskola sekundaria jerál 01 Tirilolo, eskola sekundaria jerál 02 vila nova, eskola Kafé vila antiga, eskola sekundaria Santo António Teulale, eskola sekundaria jerál Kiliki-Uaiga’e Caibada, eskola Tékniku Informátika no eskola Publiku Tekniku Vokasional, inklui juventude husi organizasaun noun governamentál.
Ekipa Kobertura : RCLM
