RCLM (03-02-2026)—Hospitál Rejionál Eduardo Ximenes (HoREX) Baucau sala Medikál Rekord, rejista pasiente kazu Denge aumenta bá na’in lima nolu resin neen (56) iha inisíu tinan 2026.
Diretór Klinika HoREX Baucau Mouzinho Fransisco relata, durante fulan janeiru kazu denge na’in-53 no fevereiru foin loron rua na’in-3, husi númeru ne’e maiória idade ki’ik no iha grave naton, maibe la lakon vida tamba hetan asistensia másimu husi pesoál saúde to’o balun hahu rekopera no alta, maibe mediku jerál ne’e la relembra númeru hira mak alta no balun ne’ebe sei baixa.
“Sira nia kondisaun (kazu denge) balun rekopera dadaun ona, balun iha sala pediatria no balun ita relajem ba sala sirujia depois ita fó alta,” dehan Mouzinho ba Jornalista sira iha nia kna’ar fatin HoREX.
Mouzinho afirma atu hakotu kazu denge liu husi konsiénsia komunidad e rasik, hodi hamos ambiénte uma sori-sorin no presiza saúde primaria halo intervensaun fumigasaun ka rega.
“Ami hospital kuandu simu ona (pasiente) hodi halo tratamentu sekundária nian,” Médiku jerál ne’e afirma.
Entertantu kazu 56 ne’e la’os MunisipiuBaucau de’it , maibe balun transfere husi Munisipiu Lautem no Viqueque hodi hetan tratamentu sekundariu iha HoREX.
Ekipa Kobertura : RCLM
