RCLM Baucau (03/03/2026)—Veteranus Hamutuk ho Autoridade Munisipiu no Seguransa, Komemora Loron Nasionál Veteranus ba dala IX iha Munisipiu Baucau.
Veteranus hamutuk ho Autoridade Sivil no Seguransa iha Munisipiu Baucau, Komemora loron Nasionál Veteranus ba dala IX, ne’ebé foka liu ba rekoñesementu sakrifisiu bo’ot ne’ebé asuwain sira luta ba Independensia, komemorasaun ne’e momentu ida ne’ebé mak halo refleksaun hodi hametin Unidade Nasionál, no asegura katak istoria luta ba libertasaun Nasionál sei la lakon.
Prezidente Autoridade Munisipiu Baucau Veneranda Lemos hateten, heransa ne’ebé Veteranus sira husik hela ba jerasaun foun laos deit liberdade politika, maibe mos responsablidade moral hodi hari’i nasaun ida ne’ebé bazeia ba Justiça no prosperiedade ba povo hotu, hodi dezenvolve nasaun ho paz no estabilidade.
Veneranda hatutan, husu ba ema hotu atu fo Onra no Gloria ba erois sira hotu ne’ebé sakrifika an mate ba libertasaun Nasional.
“Ita mos hato’o homenagen ne’ebé aas liu ba ita nia eroi no eroina sira ne’ebe husik ona ita, sira fo sira nia ran, sira fo sira nia ruin, sakrifika sira nia futuru hodi sosa liberdade ne’ebe ita goja ohin loron, sira nia mate laos deit sakrifisiu ida, maibe fini ne’ebé moris hodi hari’i nasaun ida iha era Indenpedensia, Veteranus sira mak hanesan rin ba nasaun, Veteranus mak sai mata dalan ba dezenvolvimentu no ezemplu moris ba foinsae sira”. Dehan Veneranda Lomos iha serimonia loron Nasionál Veteranus iha resintu Administrasaun Munisipiu Baucau, 03/03/2026.
Teotoni Soares ‘Koitadu’ hateten, Komemorasaun Loron Nasional Veteranus ba Dala sia, veteranus barak mak seidauk hetan moris diak hanesan asesu ba tratamentu saúde, barak mak seidauk hetan uma dignu no balun seidauk hetan rekoñesementu husi estadu no seluk tan.
“Veteranus nia moris ne’e, ita boot dala ruma hare kois, rona kois mais hau hanoin katak ladun sufisiente, tamba parte han hemu nian, toba nian, ho ninia movimentu ne’e, porke ami katuas hotu ona momemtu araska oitua”. Dehan Koitadu
Veteranu Jose Gama “Loirubi” hateten, estadu presija tau atensaun ba veteranus sira ne’ebé dook husi faselidade Saúde.
“Balun diak ona, balun sei izola hela, ida ne’e mak ami nia preokupasaun liu-liu ba saúde nian, veteranu sira iha foho ne’e, ida ne’e mak preokupasaun uituan adves mai besik saúde mais transporte mos la iha, adves dalan mos ladiak ida, dala ruma mate tiha mak sira foin telefone tamba ita nia saudozu ida ne’e mate tiha ona, bainhira ami rona mate mak prepara hela kaisaun maibe nia mate ami la hatene”. Hateten Jose
Tuir observasaun Jornalista iha tereinu nota katak, komemorasaun Loron Nasionál Veteranus ba dala sia, Veteranus barak Mak la partisipa, inklui prezidente Consellu Munisipál Kombatentes libertasaun Nasional Munisipiu Baucau Cornelho Gama L7 tamba kondisaun Moras.
EKipa Kobertura : RCLM
