RCLM Baucau (17-12-2025)—Asosiasaun Direitus Umanus no Justisa (HAK) lansa livru rezultadu peskiza kona ba Setor Agrikultura nian, ne’ebé hala’o ona iha suku sia iha Munisipiu Baucau no Munisipiu Aileu.
Vise Diretor HAK Antonino Delima hateten, objetivu husi lansamentu rezultadu peskiza Setor Agrikultura atu fo fila ba Autoridade Komunitariu sira akompaña hodi trasa planu anual kada suku hodi halo advokasia , alende ne’e sai referensia ba kada suku hato’o ba governu sentral buka solusaun ba dejafius sira komunidade agrikultor sira infrenta iha baze.
Delima akresenta, parte HAK mos sei ko’alia ho governu sentral liu-liu Ministeriu Agrikultura Peskas Pekuaria no Florestas no Ministeriu Komersiu Industria bazea ba rezultadu peskisa nune’e futuru tau orsamentu hodi apoi ba komunidade Agrikultor sira.
”Ita nia rekomendasaun husi peskija ne’e ita sei utiliza ko’alia ho Ministeriu relevante depois sira nia politika bele apoiu ba agrikultór sira,” dehan Vise Diretor HAK ba Jornalista sira iha Salaun INFORDEPE vila Nova Baucau.
Xefe Suku Tekinomata Postu Administrativu Laga Abilio Diamantino Ximenes konsidera, lansamentu rezultadu peskijza agrikultura nian ne’ebe HAK realiza importante tebes, tamba sai mata dalan ba suku no sosializa ba komunidade atu dezenvolve Setor Agrikultura.
“Rezultadu peskijza HAK halo sai ona livru fó fila ona ami ida ne’e sai matadalan ida ba ami futuru uza hodi dezenvolve agrikultor sira iha suku,” dehan Diamantino.
Enkuantu rezultadu peskijza HAK nota dejafius ne’ebé agrikultor sira hasoru mak menus kapasidade tékniku atu produs ho kualidade, mudansa klimatika halo produsaun falla, laiha bee atu fornese ba produtu ne’ebe kuda hodi aumenta kuantidade no sustentabilidade, laiha apoiu finansiamentu husi governu no dejafius seluk.
Iha munisipiu Baucau suku sia hanesan suku Uma-Ana-Ulu, Uma-Ana-Iku, Loilubu, Tekinomata, Seiçal, Buruma, Defauasi no Lavateri sai tarjeitu ba asosiasaun HAK hodi halo peskija ba setor agrikultura iha fulan neen ba kotuk iha tinan ne’e.
Ekipa Kobertura : RCLM
