RCLM-Baucau (24-11-2025)—Grupu Lia-luga apoia husi kompaña Sea Moss Timor-Leste hodi kuda produtu budu-tasi, iha tasi área Aldeia Ono-sere suku Buruma Postu Administrativu Baucau vila, Munisípiu Baucau.
Kordenador Grupu Lia-luga Adolfo da Silva hatete, sira nia grupu inísia kuda produtu lokál budu-tasi, tamba apoiu husi empreza Sea-Moss hodi kria empregu ba komunidade nune’e bele hetan rendimentu ekonómiku atu responde ba nesesidade familia.
”Ami ohin primeiru ka hahú kuda budu-tasi ne’e negosia ita nia kompaña Laga Sols tamba nia intensaun kria servisu nune’e ita ba negosia lori budu-tasi ne’e mai to’o Buruma ita fó ba ita nia joven sira servisu ka kria empregu iha suku Buruma ida ne’e”hateten Kordenadór Grupu Lia-luga ba Jornalista sira iha tasi Lialuga Aldeia Ono-sere suku Buruma.
Fatin hanesan Gerente Kompaña Sea moss iha Timor-Leste Tomas Gama hateten, antes ne’e apoiu ona produtór budu-tasi iha Ataúro no Liquiça no tinan ne’e espanda tan programa ajudu iha Munisípiu Baucau, hafoin hetan komunikasaun husi grupu Lia-luga ho lideransa komunitáriu suku Buruma.
Nia akresenta, intensaun apoiu grupu Lia-luga kuda budu-tasi hodi aumenta kuantidade produsaun iha Timor-Lest, hodi responde ba nesesidade konsumidor.
”Iha de’it loromonu mezmu iha rezultadu maibe ami hare katak kuantidade la másimu, entaun hanesan gerente hanoin lori tan programa mai Baucau, la’ós tamba Baucau oan ne’e ne’ebé tenke lori mai Baucau maibe merese kuda mos área Munisípiu Baucau nian, maibé sei abranje husi Vemasse to’o Kom no lokasi kuda ona budu tasi hamutuk 13, entaun ekipamentus uza kuda budu-tasi kompañia mak sosa rasik apoiu tomak komunidade grupu sira simu materiál hala’o atividade kuda budu tasi, ninia rezultadu ka kuantidade budu tasi barak no di’ak kompañia prontu sosa signifika kompania iha ona fábrika, tamba ne’e husu ba komunidade sira interese ita ko’alia ba malu ami oferese ekipamentus,” esplika Gerente Kompaña Seamoss.
Xefe Suku Buruma Liborio dos Santos Freitas, agradese ba kompañia Seamoss tamba apoia no motiva ona grupu Lia-luga husi Buruma hodi kuda budu-tasi nune’e bele hetan rendimentu ekonómiku família.
”Autoridade agradese no apresia ba empreza balun ne’ebé mai komesa motiva ita nia komunidade Buruma oinsá partisipa kuda budu-tasi ne’e hodi fó rendimentu mos tamba durante ne’e komunidade nia rendimentu mai husi atividade órtikultura de’it, maibe nia merkadu problema entaun dalabarak komunidade preokupa kondisaun ne’e,” dehan Lideransa Komunitáriu Buruma.
Entertatu, grupu Lia-luga husi Suku Buruma iha membru na’in sia, inisia kuda Budu-tasi, área tasi hamutuk metru atus haat kudradu no apoiu ne’ebé kompaña oferese mak hanesan Tali rafia, fini budu-tasi ekipamentus seluk tan.
Ekipa Kobertura : RCLM
