RCLM Baucau (03-03-2026)—Governu liu husi Ministeriu Asuntu Kombatente Libertasaun Nasionál (MAKLN) no Ministeriu Saúde (MS), presiza halo kordenasaun servisu hodi fó tratamentu saúde ba veteranus sira hela área rurál iha munisipiu Baucau, tamba balun hetan moras la halo tratamentu saúde to’o lakon vida.
Rekomendasaun ne’e hato’o husi Veteranus José Gama‟Loirubi” Iha ámbitu komemorasaun loron Nasionál Veteranus ba dala-sia (03 Marsu 2017- 03 Marsu 2026) hateten, loron Nasionál Veteranu ne’ebé kada tinan halo selebrasaun iha loron 3 fulan Marsu, importante tebes ba Veteranus sira, maibe nia preokupa maluk veteranus balun labele partisipa tamba, kestaun idade ona, la’o labele no moras maibe la halo tratamentu ba sira nia saúde, tamba ne’e husu profisionál saúde to’o área rurál hodi fó tratamentu.
“Loron Veteranus 03 Marsu 2026 ohin selebra ba dala-sia ona, maibe ami veteranus sira ohin partisipa iha ne’e, ami nia preokupasaun ba maluk sira ne’ebé la’o labele iha hela fatin, saúde mos lakontrola to’o baze balun mate ona mak telfone ami, tamba sem kontrola saúde tamba ne’e, se bele Ministériu Saúde to’o baze sira fó tratamentu ba maluk sira la’o ladi’ak katuas ona no susar ba transporte liu-liu hela área rurál labesik dalan, moras grave mate ona foin ami hatene no liga ba konsellu prepara de’it kaisaun, maibe ema ne’e moras oinsá lao oinsá nuka hatene,” dehan Veteranus José ba Jornalista sira iha resintu Autoridade Munisipál Baucau tersa ne’e.
Veteranus husi Postu Administrativu Venilale Vicente de Souza Boavida “Sala-La’ek” informa, Konsellu Munisipál Kombatentes Libetasaun Nasionál Baucau estabelese ona klinika Veteranus David Alex Daitula iha Riamare, maibe Governu presiza apoiu másimu liu-liu medikamentus hodi fó atendementu ba Veteranus sira ne’ebé moras.
“Ita nia Munisipiu Baucau husi prezidente sesante “Berdu” komesa esforsu lubuk ida monta ona klinika Daitula iha Baucau, hau sempre konsulta maibe ai-moruk la to’o sira sempre fó reseita ami sosa ai-moruk,” afirma Veteranus Vicente.
Hatan ba kestaun ne’e, Asistente Politika Konsellu Munisipal Kombatente Libertasaun Nasionál Baucau Sidonio Ximenes “Mau-Nanis” rekoñese, klinika Veteranus David Alex Daitula sei menus medikamentus no rekursu umanus, hodi fó atendementu ba Veteranus sira iha área rural, maibe hamutuk ho estrutura KMKLN planeia sei hato’o pedidu hodi husu medikamentus no aumenta rekursu umanus hodi fó asistensia Saúde ba Veteranus sira.
“Ami sei kria kondisaun no halo reuniaun ida atu identifika ita nia Veteranus sira iha área rurál hodi fó asisténsia saúde liu-liu dotor metan ne’ebé fila ba nia rai, lolos to’o ona maibe funu iha rai liur sei atraza oituan ba nia viajem ho aviaun, tamba ai-moruk saida mak presiza ita husu ba ita nia doadores sira, ami nia mediku balun mos sai ba kontinua estudu, tamba ne’e ami mos sei hato’o pedidu oinsá aranja mediku funsionariu públiku tamba ne’eba sei menus hela,” hateten Mau-Nanis.
Enkuantu estrutura Konsellu Munisipal Kombatente Libertasaun Nasionál Baucau MMau-Nanis” husu ba Veteranus sira, iha área rurais hetan moras halo tratamentu iha fasilidade saúde sira ne’ebé Governu estabelese iha Suku no Postu nune’e bele rekopera.
Ekipa Kobertura : RCLM
