RCLM Baucau (15/10/2025)—Nonu Governu Konstituisional hala’o dialogu ho estudante sekundariu sira liu husi karakter formasaun dame nian iha munisipiu Baucau, tamba estudante sira mak espesial tebes iha nasaun soberanu ida ne’e.
Vise Primeiru Ministru no Ministru Koordenador Asuntu Sosial Mariano Sabinu Asanami enkoraja estudantes sira presija respeita inan aman no manorin sira, tamba sira mak forma ema nia mentalidade, Fiziku, Espiritual no Intelektual.
Vise Primeiru Ministru hateten, fulan outubru tinan ne’e Timor Leste sai Membru ASEAN ba Nasaun 11 tamba ne’e estudante sira presija Estuda maka’as no kria paz no estabilidade iha rai laran.
“tamba oan sira alin sira ne’ebe ke iha ne’e imi maka importante teb tebes ba ita nia rai, imi mak VIP katak imi ne’e espesial tebes ba ita nia rai no ita nasaun, tamba ne’e mak imi nia avo ita hotu nia avo Nana mak haruka hodi ba hasoru ita nia oan sira, hau nia bee oan sira tamba sira importante tebes, razaun segundu lakleur tan imi hotu hatene fulan outubru ne’e ita sei tama ba Asean, wainhira ita tama ba Asean ita sei halo kompetisaun formasaun hanesan ne’e, ita nia bareira sei loke ba ema seluk, ita mos sei tama ema seluk nia nia rai hanesan familia iha Asean, entaun se mak importante liu atu bele ita iha valor ita iha dignidade, ita bele kompete”. Hateten Vise PM iha Salaun Ginasio Baucau Kuarta Feira (15/10/2025).
Prezidente Autoridade Munisipiu Baucau Veneranda Lemos konsidera dialogo ne’e importante tebes, tamba kolia kona ba pas no estabilidade iha Munisipiu Baucau.
“Dialogo ne’e importante tebes tamba dialogo ne’e mak sei kolia matan ho matan fuan ho fuan atu hare kona ba paz no estabilidade, hare kona ba ita nia rai atu ba ne’ebe kontribuisaun estudante sira nian ba iha konstituisaun estadu dezenvolvimentu ba ita nia rain ida ne’e, ita kontente atu rona Vise Primeiru Ministru no reprejentante Ministeriu Edukasaun”. Dehan PAM Baucau
Entertantu Estudante Celma do Rosario da silva hateten, sente kontente tebes partisipa iha dialogo ne’e tamba importante tebes, iha ne’ebe nia parte sei Kria paz no estabilidade iha Munisipiu Baucau.
“Sim importante duni tamba iha ne’e ami bele hatene klean liu tan kona ba senhor senhara sira nia aprezentasaun kolia kona ba paz, Edukasaun no Nasaun , nudar estudante hau mos sei banati tuir kona ba liafuan sira ne’ebe sira hato’o mai ami atu nune’e lori ita nia nasaun ba oin” hatete Celma
Estudante sira nebe partisipa iha dialogu ne’e mai husi eskola Essa Baucau, Tekniku Vokasional, ETI, eskola sekundario Klik Waigae, Eskola Sekundario Jeral 01 Tirilolo, Eskola sekundario jeral 02 Vila nova Baucau, Eskola Sekundario Sagrado Coração de Jesus, no Eskola CAFE.
Ekipa Kobertura : RCLM
