RCLM Baucau (16/07/2025)—Fundasaun Patria kolabora ho Nonu Governo Constitucional liu husi Gabinete Apoio Sociedade Civil (GASC), realiza programa empoderamentu feto konsellu suku konaba hasae abilidade lideransa transformasional.Formadora husi ONG Fundasaun Patria Idalia Boavida Hateten, Objetivu prinsipal ezekuta aktividade formasaun ne’e, atu bele hasae abilidade lideransa transformasional feto konsellu suku, hodi partisipa aktivu no kontribui ho kualidade iha prosesu dezenvolvimentu suku ba sustentabilidade iha futuru.
Nia hatutan Konteudu formasaun pakote lideransa transformasional kompostu husi materia importante hitu ne’ebe sei faselita ba Partisipantes sira.
“Materia importante hitu ne’ebe sei fo ba partisipantes sira mak hanesan, Kna’ar konsellu suku, Igualdade no Inkluzaun, Kna’ar orgaun soberania ou demokrasia, Lideransa transformasional, Advokasia, Public speaking ou abilidade komunikasaun, CEDAW, nomos Transformasaun Suku”. Dehan Formadora Idalia ba jornalista RCLM Baucau quarta Feira 16/07/2025
Idalia salienta espera liu husi formasaun ne’e bele aumenta lideransa feto sira nia abilidade hodi atende komunidade ho diak.“Ita nia esperansa ba partisipantes sira liu liu maluk feto sira maka ita espera durante loron 3, sira ativo bele hasae sira nia abilidade hodi implementa fali iha sira nia suku ida idak”. Hateten Formadora
Reprejentante Prezidente Autoridade Munisipiu Baucau Maria Celestinha Viegas hateten, formsaun ne’e importante tebes ba lideransa Feto sira, tamba sira mak besik liu povo nune husu atu partisipa ativo atu bele komprende sira nia knaar diak liu tan.
“Husu ba Xefe suku Feto sira, delegadu, delgada joventude feto sira, atu partisipa masimu iha formasaun ne’e tamba formasaun ne’e importante tebes ba sira oinsa mak sira bele komprende diak liu tan sira nia kna’ar hodi atende komunidade ho diak”.
Entertantu Partisipante husi Delegada Waturau Suku Gariwai Graciana Lino Marçal sente Kontente tebes, tamba bele partisipa iha formasaun ne’e hodi aumenta koñesementu kona ba oinsa empoderamentu Feto iha suku.
“Ohin hau mai tuir formasan sente kontente tebes, tamba formasaun ne’e importante tebes ba hau oinsa bele aumenta hau nia konesementu, liu-liu kona ba lideransa feto ne’ebe diak iha suku laran”. Dehan Partisipante
Programa empoderamentu refere sei implementa liu husi aktividade formasaun lideransa transformasional iha Municipio Baucau, Manatuto, Dili, iha tinan fiscal 2025. Aktividade ne envolve membru konsellu suku feto hanesan (xefe suku feto, xefe aldeia feto, delegada aldeia feto nomos joven feto) hamutuk nain 50 iha munisipiu Baucau. Ekuantu Aktividades ne’e realiza durante loron Tolu hahu quarta feira to’o Sexta Feira semana ne’e.
Ekipa Kobertura : RCLM
Feto mos bele, feto mos iha abilidade atu sai nudar lideransa iha komunidade nia leet.