RCLM Baucau (16-12-2025)—Formandu dalen Inglés faze segundu hamutuk 278 kompostu feto 98 no mane 189 iha Munisípiu Baucau, simu Sertifikadu apresiasaun husi Governu liu husi Sekretáriu Estadu Formasaun Profisionál Empregu.
Diretor Nasionál Aprovizionamentu SEFOPE Jacinto da Costa Soares hateten, formandu sira antes ne’e tuir ona vaga online husi Austrália maibé la pasa tamba valór la tuir kriteriu 50 ba leten, nune’e SEFOPE kria formasaun durante fulan tolu sira termina ona tamba ne’e fó sertifikadu apresiasaun hodi kontinua faze teste tuir mai.
”Sira ne’e teste tinan kotuk valór la tama kriteria entaun ita fó oportunidade sira, ita mós rekruta formadór sira fó formasaun língua inglés ne’e,” dehan Reprezentante Sekretáriu Estadu Formasaun Profisionál Empregu ba Jornalista sira hafoin remata atribuisaun sertifikadu ba formandu sira iha CCB Vila Antiga segunda (15-12-2025).
Serkretariu Autoridade Munisípál Baucau Asuntu Sosiais no Organizasaun Maria Celestina Viegas konsidera dalen inglés importante ba joven sira tamba ne’e, tenki aprende makas hodi kompete bá kampu servisu rai laran no rai li’ur.
”Ita ohin loron tama ona membru ASEAN, lian ofisiál Tetun, Portugés no lian servisu hanesan Inglés presiza kapasita tamba juventude presiza hatene hodi kompete iha merkadu traballu,” hateten Reprezentante Autoridade Munisipiu Baucau.
Formanda Vitória Cidalia Soares agradese ba SEFOPE tamba kria ona formasaun sira aprende dalen ingles, atu kontinua ba teste fase tuir mai tamba antes ne’e apply vaga online husi Austrália valór la to’o 50.
”Ami agradese tebes ba SEFOPE tamba fó fali ona oportunidade ba ami tuir formasaun hodi hadia ami nia valór atu kompete fali kampu servisu,” dehan Formanda.
Entertantu total formandu 278 ne’ebé simu sertifikadu kompostu feto 98 no mane 189.
Ekipa Kobertura : RCLM
