RCLM (14-01-2026)—Diresaun Munisípál Konservatóriu Servisu Rejistu Notariadu (DMKSRN) Baucau, fó atendementu sidadaun sira trata dokumentus Bileti Identidade (BI) maibé provizória ho suratahan tamba, ekipamentu fargom print BI orijinál avaria ka at durante tinan tolu to’o agora seidauk hadi’a.
Sidadaun husi Postu Administrativu Venilale Francisco Guterres sente preokupa tamba halo BI maibé provizória de’it, bainhira uza atu ba banku foti osan labele simu tamba ne’e governu liu liu Ministériu Justiça solusiona lalais makina fargom iha Notariadu ne’ebé at, nune’e bele print BI orijinál ba sira.
”Ami mai foti BI fó de’it provizória asli laiha, entaun ami ba mai de’it ba Banku foti osan mós araska tamba ne’e ami husu ba Governu hadi’a makina ne’ebé avaria tinan tolu ona ne’e,” nia ejize.
Diretora Diresaun Munisípál Konservatóriu Servisu Rejistu Notariadu Baucau Justinha da Neves Mendonça rekoiñese fargom print BI orijinál avaria desde fulan dezembru tinan 2022 to’o agora, tamba ne’e halo atendementu faselita de’it BI provizória ho suratahan.
Nia akresenta, difikuldade ne’e aprezenta ona relatóriu ba diresaun Nasionál atu halo manutesaun no posivel apoiu fargom foun hodi print BI orijinál ba kliente, maibé to’o agora seidauk iha resposta pozitivu.
”Agora daudaun ita halo atendementu BI ba ita nia kliente sira iha Munisípiu Baucau la’o normal maibé nafatin fó suratahan tamba, Munisípiu Baucau nia kauza fargom at tinan 3 liu ba to’o agora seidauk hetan ekipamentus di’ak no bele halo atendementu,” Diretóra DMKSRN Baucau klarifika.
Maske DMKSRN Baucau makina fargom print BI orijinál avaria, maibé fó atendementu ba sidadaun sira atu hetan BI provizória husi segunda to’o kinta no kada loron rejista kliente másimu to’o 200.
Alende ne’e mós parte diretora DMKSRN simu husi ona informasaun husi Responsavel Balkaun Úniku katak iha fulan Janeiru ne’e sira bele fó atendementu sidadaun sira ne’ebé trata BI orijinál.
Ekipa Kobertura : RCLM
