RCLM (31-01-2026)—Familia Saleziana Munisipiu Baucau sabadu fim de semana ne’e, organiza festa São João Bosco ne’ebé kada tinan selebra iha loron 31 fulan janeiru.
Diretór Kasa Komunidade Saleziana iha Munisipiu Baucau, Padre Adérito Manuel Euclides Victor da Costa SDB esplika, uma kreda katólika hili São João Bosco nu’udar santo, sai mestre no aman ba foinsa’e sira tamba ne’e importante tebes ba família saleziana selebra festa fundador São João Bosco, ne’ebé moris ho misaun tranforma foinsa’e sira ne’ebe hetan difikuldade ba moris ksolok.
Diretor Kasa Komunidade Saleziana Baucau husu sarani sira banati tuir São João Bosco nia misaun sai sidadaun ne’ebé di’ak no partisipante iha sosiedade ho karakter di’ak, partisipativu iha kna’ar tomak.
“Don Bosco nia misaun existe iha Timor no mundu tomak ho objetivu hanesan ho familia saleziana tomak tau matan ba foinsa’e sira, tamba ne’e iha Baucau ita selebra tamba existensia saleziana iha Baucau tinan ida ne’e 64, entaun nia fundasaun metin liu iha ne’e no eduka ema barak ba dalan ne’ebe los no di’ak liu nian, tamba ne’e ita haksolok santo ne’e universal uma kreda nian, kristaun ne’ebe di’ak hala’o nia fiar loron ba loron bo’ot no klean liu tan atu nune’e ho Maromak ida, tamba nafatin ho Maromak halo buat ne’ebe di’ak ida ne’e mak dehan santo ,Don Bosco dehan ba foinsa’e sira hala’o didiak imi nia kna’ar ne’e mak imi nia dalan ba santu,”dehan Padre Adérito bainhira remata preside misa asaun de grasa iha Igreja parokia Santo António vila Antiga Dioseze Baucau
Tempu hanesan Vigario Jerál Dioseze Baucau padre Alipío Pinto Gusmão hateten, selebrasaun festa São João Don Bosco la’os festa salezianu nian mesak maibe uma-kreda no sarani hotu nian, hodi halo misa memoria obrigatoria no momentu reflesaun, oinsá sarani sira moris iha karizma Don Bosco nian dedika an hodi tau matan no besik liu ba joven sira.
“Ida ne’ebé sai optimista wainhira iha difikuldade no problema sira joven sira nia let dalaruma ulun tos no nakarten, maibe saleziana sira tenke sai optimista tamba mestre Don Bosco ne’e hakarak atu ita dedika ita nia an ba edukasaun no formasaun joven sira nian,”dehan Padre Alipío.
Reprezentante komisaun Organizador Mateus António Ximenes konsidera, selebrasaun festa são João Bosco importante tebes ba sarani katolika, tamba ne’e liu husi kontribuisaun entidades oi-oin hamutuk ho antigus alunus no familia saleziana iha Baucau organiza festa aniversariu São João Bosco tinan ne’e .
“Festa são joão Bosco tinan ne’e kontribuisaun loja ka emprezariu hotu-hotu no individual antigus alunus orsamentus hamutuk liu rihun ualu, ba tinan ne’e boot liu kompara tinan kotuk osan rihun tolu, tinan ne’e apoiu husi F-FDTL, PNTL ne’ebé di’ak liu, no ita haksolok tebes tamba sentidu pertense ba Don Bosco ne’e iha, tinan ne’e mos festa simu ka prezensa 100 anus antigus alunus iha Timor-leste ne’ebé ita Baucau sei simu iha 27 fulan agostu,” hateten reprezentante komisaun Organizador.
Entertantu hola parte iha selebrasaun festa São João Bosco kompostu Autoridade sivíl no seguransa, padre, madre, antigus alunus husi selezianu, estudante esninu baziku to’o ensinu sekundaria públiku no privadu iha Baucau vila, nomos sarani sira.
Ekipa Kobertura : RCLM
