RCLM Baucau (01/08/2025)—Sesta-feira ne’e, Forsa Falintil Defeza Timor Leste hamutuk ho Autoridade Munisipiu Baucau halo lansamentu fatuk dahuluk hodi konstrui Uma hanaran “Uma Ba Ema Ne’ebe Presiza” ba familia Vulneravel iha Suku Tirilolo Postu Administrativo Baucau Vila Munisipiu Baucau, hodi komemora loron Falintil ba dala 50 ne’ebe sei realiza iha loron 20 fulan augusto Tinan ne’e.
Xefe Estadu Maior F-FDTL Brigadeiru Jeneral Jose da Costa Soares Trix hateten, uma ne’ebe Forsa Falintil Defeza Timor Leste fo ba Familia vulneravel ne’e ho objetivo atu hatudu sentidu solidaridade no domin ba populasaun sira ba moris diak.
Trix hatutan Falintil ne’ebe luta no aten brani ba liberdade hodi forma identidade rai lulik no onra bo’ot, atu foti passu dahuluk hodi hari’i uma ba familia Vulneravel sira hanesan simbolikamente iha munisipiu lima ho intensaun sei kobre ba munisipiu hotu inklui RAEOA.
“Tamba sa mak falintil hanoin halo buat ida ne’e tamba komandu konkretamente agora dadauk ka’er ne’e mesak komandu falintil ne’ebe mai husi ailaran ne’e, tamba tinan ida ne’e falintil halo aniversariu ba tinan 50 to’o ona tempu para depois komandu sira ne’ebe mai husi ai laran ne’e atu liberta ita nia rai ne’ebe mak agora la’o dadauk ne’e no agora kontinua luta ba povo nia moris diak”. Dehan Brigadeiru Jeneral Trix ba jornalista sira depois halo lansamentu fatuk dahuluk iha Area PLN Sesta feira 01/08/2025
F-FDTL mai atu hatur fatuk dahuluk ba konstrusaun uma ne’ebe se laos deit mahon ba familia Olinda, maibe sei la’o nafatin tuir kbi’it ne’ebe mak iha no somboliza ba ita nia nasaun komprimisiu dignidade moris diak sidadaun sira nian, liu husi situasaun ne’ebe vulneravel.
Prezidente Autoridade Munisipiu Baucau Veneranda Lemos hateten, rekomenda ba familia Benifisiariu sira atu kuidadu no hamos nafatin refere hodi utuliza ba tempu naruk.
“Hau husu tenki hamos para tenki higene para oan sira bo’ot ne’e sira hatene ona, dehan moris ho higene ne’e oinsa, ita agradese ba Aman Maromak no agradese mos ba ita nia Heroi no Heroina sira durante tinan naruk, hamutuk mos ho inan aman sira ne’ebe ohin sei iha ita nia le’et ne’ebe defende ita nia rai hodi oferese ba ita ukun rasik an ida ne’e”. Haktuir PAM
Entertantu Familia Benifisiariu sente Kontente no agradese tebes ba Forsa Falintil Defeza Timor Leste no Autoridade Munisipiu Baucau, ntamba bele oferese ona uma ida ba sira.
“Ami sente kontente no agradese tebes ba F-FDTL no Autoridade Munisipiu Baucau, tamba oferese ona uma ida ba ami”. Hateten benifisiariu
Enkuantu uma ne’e nia medida metru 90 kuadru kompostu kuartu tolu, sala Vizita, Sala Jantar, Varanda inklui sei kompleita fatin sanitariu no Dapur.
Ekipa Kobertura : RCLM
