RCLM Baucau (17-12-2025)—Servisu Munisipál Edukasaun Baucau kuarta ne’e anunsia rezultadu ezame nasionál tinan akademíku 2025, estudante terseira klase kompostu ensiñu báziku no ensiñu sekundaria hamutuk lima nolu resin sia (59) mak reprovadu (la pasa).
Diretór servisu Munisípál Baucau Afonso dos Santos da Costa relata, estudante terseira klase ne’ebé reprovadu ensiñu báziku na’in-55, aprovadu hamutuk 2.571, ensiñu sekundaria jerál na’in-4 mak reprovadu, aprovadu hamutuk 2.321 no ensiñu sekundaria tékniku vokasionál finalista hamutuk 237 aprovadu 100%.
”Edukasaun Baucau hare rezultadu ne’e normál buat ezame nasionál balun lakon no manan maibé husi Edukasaun Baucau sente orgullu no agradese tamba halo komparasaun tinan ne’e di’ak liu tinan kotuk tamba tinan ida ne’e nia pursentajen pasa bo’ot liu,” hateten Dirijente servisu Edukasaun Munisípiu Baucau ba Jornalista sira iha Salaun EBC 03 Vila Nova.
Diretor ensiñu báziku sentrál 01 Tirilolo Postu Administrativu Baucau vila hateten, estudante terseira klase tinan ne’e tuir ezame nasionál hamutuk 109 maibe rona anunsia rezultadu ezame nasionál nivél Munisipál Baucau nia estudante na’in 10 mak la pasa, tamba ezame periodu primeiru no segundu sira hetan valór ki’ik.
”Na’in 10 la aprovadu tamba, valór husi primeiru no segundu periodu iha ki’ik 5 no 4 ne’ebé ohin rezultadu fó sai tuir duni estudante sira nia kapasidade ita rekoiñese,” dehan Diretór EBC 01 Tirilolo.
Enkuantu tuir planu Ministériu Edukasaun anunsia rezultadu ezame nasionál nivél eskolár sei realiza iha loron 18 fulan dezembru tinan 2025.
Ekipa Kobertura : RCLM
