RCLM(02-02-2026)—Kámara Komersíu Industria-Timor-Leste (CCI-TL) Munisipiu Baucau, apresia meius no esforsu tomak husi Autoridade Munisipál Baucau (AMB), hodi hato’o ba governu sentral liu-liu Ministériu Obras Públika, atu lansa projeitu reabilitasaun estrada urbana Baucau vila iha sesta (06-02-2026) semana ne’e.
Prezidente CCI-TL Munisipiu Baucau José Januario “Noky” hatete, Munisipiu Baucau segundu kapital maibe infraestrutura estrada urbana Baucau vila tinan 20 resin at, maibe esforsu Autoridade Munisipal maske hasoru difikulade oi-oin konsege buka meius tenta governu sentral atu lansa iha semana ne’e, no fó esperansa bo’ot ba empreza Baucau oan ne’ebe kaer obra ne’e sei kualidade.
“Setór privadu CCI-TL Munisipiu Baucau ita kontenti no presta respeitu ba Prezidente Autoridade Munisipiu nia esfosu no tenta meius hotu realiza programa ne’e, iha obstakulu no impedementu balun maibe ho governu sentral nian apoiu konsege realiza, tamba Baucau hanesan segundu maiór kapital Timor ita tenke halo ordenamentu teritoriál ida ke di’ak hanesan infraestrutura bázika estrada urbana ne’ebé ita hare tempu naruk kuaze tinan 20 resin realiza semana oin, ita espera obra ne’e kualidade iha ita nia Munisipiu,” dehan Prezidente CCI-TL Munisipiu Baucau “Noky” ba RCLM iha Vila Antiga.
Nia afirma prosesu ordenamentu teritoria área urbana Baucau, CCI-TL Baucau kontribui másimu liu husi membru asosiasaun vendedór hodi re-aloka vendores sira ba merkadu Munisipál (Tua-nau), no kontinua hadia konetvidade estrada hodi faselita di’ak movimentu sidadaun sira, halo negósiu hodi hasa’e kresimentu ekonomiku iha Baucau.
“Husi inisiu kedas re-alokasaun merkadu ita nia kontribuisaun másimu ne’eba tamba, ita ko’alia membru sira no asosiasaun vendedores sira re-aloka no akontese tenke iha konetividade ne’ebé di’ak mai husi estrada hodi provoka keresimentu merkadoria, tamba ne’e benifisiu simples no kontribuisaun kamara komersiu industria hamrik iha Prezidente Autoridade Munisipiu ho entidades governamental nia sorin,” Noky esplika.
Prezidente Autoridade Munisipiu Baucau Veneranda Lemos Martins deklara, reabilitasaun estrada urbana Baucau durante komunidade hein sei lansa iha loron 6 fulan fevereiru iha vila Antiga husi Ministériu Obras Publika no prezensa direta husi Primeiro Ministru, alende ne’e apela ba komunidade afetadu atu kontribui másimu ba reabilitasaun no alargamentu estrada ne’ebe Baucau oan hotu hein.
“Loron 06 fevereiru hanesan Baucau oan ita hamutuk iha resintu Administrasaun Postu Baucau vila nian, hodi simu delegasaun nasionál ne’ebe lidera husi Ministru Obras Publika no prezensa husi primeiru Ministru Avo Nana, sei mai halo primeira pedra estrada urbanas ne’ebé ita hotu hein, entaun husu mos ba komunidade sira hela besik estrada kuandu halo alargamentu kona buat ruma ita kontribui,” PAM Baucau epela.
Entertantu estrada urbanas Baucau vila kofirmadu ona atu lansa sesta semana ne’e, hodi reabilita hamutuk 23 kilómentru no kompaña Jova konstruktion mak sai maman nain hodi implementa projeitu ne’e.
Ekipa Kobertura : RCLM
