RCLM Baucau (27/01/2026)—Estrada husi dalan publiku ligasaun ba suku Uma-Ana-Iku Postu Administrativo Venilale Munisipiu Baucau kuaze kilometru tolu resin kondisaun aat, hodi difikulta komunidade sira asesu transporte publiku hodi lori produtu lokal ba merkadoria.
Abitante suku Uma-Ana-Iku Felix Boavida Ximenes hateten, sente triste tebes ho kondisaun estrada ne’ebe aat obrigadu la’o ain lori produtu lokal to’o iha dalan publiku hafoin asesu ba transporte publiku sira, tamba nesesidade uma laran obriga.
Abitante ne’e husu ba nonu governu konstitusional atu hadia kondisaun estrada ne’ebe aat.
“Kona ba estrada ida ne’e kondisaun ladun diak, tamba ne’e hadia estrada ne’e para povo lori produtu lokal ne’ebe ke oi oin iha aldeia no suku laran mak hanesan produtu iha ne’e modo, kamii, kulu, Repollu iha hotu, maibe falta estrada mak la dun diak ba ami povo ida ne’e ami sente triste, presija atu hadia tamba ami la’o ain mak lori produtu sira ne’e to’o estrada boot asesu transporte ba munisipiu.” Ba jornalista sira iha suku Uma Ana Iku tersa, 27/01/2026
Xefe suku Uma-Ana-Iku Antonio da Costa Freitas hateten, relasiona ho kondisaun estrada ne’ebe aat parte autoridade suku sempre hato’o pedidu ba iha reniaun asembleia Postu Administrativo, maibe to’o agora seidauk iha informasaun positivu.
“Ami preokupa mak ne’e husu ba governu liu liu nonu governu tau atensaun ba estrada ba komunidade komunidade presija, buat hotu la’o diak maibe soke estrada deit, ami sempre hato’o liu husi enkontru maibe ita hato’o mais mak ne’e to’o ate a data seidauk realiza buat ida, ne’e be husu nafatin governu, tuir mai mak ami hato’o tenke toma responsablidade ba ita nia komunidade”.
Administrador Postu Administrativo Venilale Jose Freitas Boavida hateten, tinan tolu liu ba PNDS halo ona reabilitasaun ateru ho rai mutuin maibe to’o agora kondisaun estrada at fila fali ona tamba ne’e, parte autoridade Postu Administrativo nafatin servisu hamutuk ho autoridade suku hodi halo levantamentu ba infraestrutura sira iha suku to’o iha aldeia.
“Autoridade postu sempre servisu hamutuk ho autoridade suku sira atu halo levantentu ba nesesidade sira hanesan estrada, ponte ne’ebe maka iha area suku rua ne’e, nafatin tau iha prioridade tamba ne’e mak PNDS faziadamente no tinan kotuk ita aprova estrada sira parte husi keliboruwai, maibe tinan ida ne’e tau mos prioridade ba, tamba iha PNDS ne’e iha quinzi pursentu bele tau fali hodi hadia estrda sira ne’ebe aat ona, ne’e so kompetensia husi konsellu suku no konsellu aldeia lori ba asina nune’e ita bele aprova”.
Estrada refere suku rua mak asesu hanesan suku Uma-Ana-Iku no Uma-Ana-Ulu Ho total populasaun rihun tolu resin.
Ekipa Kobertura : RCLM
