RCLM Baucau (25/03/2026)—Koordenador Eskola Ensino Baziku Katolika Santo Antonio Domingus Sarmento hateten, hahu hosi tinan 2025 to’o mai agora, professores nain hat deit mak hanorin estudante hosi primeiru ano to’o iha sexto ano.
Nia hatutan difikuldade ne’ebe mak eskola refere hasoru mak menus duni profesores, tamba nain ida mate no nain rua seluk tama ba iha reforma no transferensia eskola seluk hodi difikulta ba prosesu aprendisagem iha eskola, ho preokupasaun ne’e sente triste tebes tamba, nain hat deit labele kobre to’o sala neen.
“Ami triste teb-tebes tamba ami nain hat deit labele kobre sala neen hotu, lolos ne’e ami nain hat atende ba sala hat maibe ami nia professor hetan reforma obrigatoriu husi Ministeriu Edukasaun, tamba ne’e oinsa organiza malu atu jere para labele halakon labarik sira nia direitu iha tempu aprendisagem, antes ne’e ami nain hitu maibe ami nia kordenador ida mate ida reforma ida kona transferensia ida ne’e, mak ami menus Professores”. Dehan Domingos Sarmento ba jornalista RCLM Baucau foin lalais ne’e.
Koordenador Domingos Sarmentu hatutan ho preokupasaun ne’e, relata ona ba Ministeriu Edukasaun no parte fundasaun, maibe to’o agora seidauk hetan resposta ruma hodi subtitui ba profesores foun.
“Ami rekomenda ona ba fundasaun São Jose katak, ami presija ema nain rua i pedidu ne’e ami hatama tiha ona, hein bainhira governu kolokasaun karik oinsa hare ba ami nia eskola ida ne’e tamba ami presija manorin nain rua ba klase rua, pedidu ne’ebe ami halo ami seidauk iha resposta ruma husi fundasaun tamba ne’e ami rekomenda nafatin ba fundasaun no Governu liu-liu Ministeriu Edukasaun para bele professor nain rua mai ami nia eskola”. Hatete Kordenador
Eskola Ensino Baziku Katolika Santo Antonio Uatu-Ua ne’ebe lokaliza iha suku Gariuai Postu Administrativo Baucau Vila Munisipiu Baucau, Enkuantu total estudante hamutuk ualu nolu resin neen kompostu husi feto hat nolu resin hat no mane hat nolu resin rua.
Ekipa Kobertura : RCLM
