RCLM-Baucau (13-11-2025)—Eskola Báziku Sentrál (EBC sígla portugés) vila nova Baucau, matéria preparadu hodi realiza ezame terseiru trimestre bá estudante primeiru anu no segundu anu, ne’ebé tuir kalendáriu sei hahú iha loron 17 fulan ne’e.
Adjuntu Diretor EBC Vila Nova Baucau Lucio Guterres hateten, profesores sira halo preparasaun imprime matéria ezame ba terseiru periodu komesa fulan kotuk to’o atuál finaliza ona, iha sesta semana ne’e fahe órariu hodi realiza ezame iha segunda semana oin.
“Aban (sesta) ami limpeiza depois merenda hotu sei fahe órariu sábado pauza hein segunda ezame de’it,” informa Lucio ba RCLM iha nia kna’ar fatin vila nova kinta ne’e.
Vise Diretor informa, konsellu profesores sira antes ne’e hala’o ona enkontru fahe profesores ba pakote rua, pakote ida halo vijilansia ba estudante durante ezame no pakote rua halo koreksaun ba pontus ezame.
“Ami kada tinan fahe profesores, labele ezame tiha mak halo koreksaun maibé ezame la’o koreksaun mos la’o, kada sala ida profesores halo vijilansia no profesores 14 mos prepara iha sala profesores halo koreksaun atu nune’e ezame hotu koreksaun mos hotu, ami bele fahe ona profesores daturma elabora valór tau ba kaderneta,” akresenta Adjuntu Diretor EBC Vila Nova.
Entertantu estudante EBC Vila Nova atu partisipa ezame terseiru trimestre tinan ne’e hamutuk 443, kompostu primeiru anu 215 no segundu anu 228.
Ekipa Kobertura : RCLM
