RCLM Baucau (29/03/2026)—Bispu Diocese Baucau Dom Leandro Maria Alves iha misa Domingu Ramus Hateten, tama iha semana santa sarani sira presija husik hahalok aat sira, odio, no husik liafuan kro’at sira no labele hanoin aat ba ema seluk, maibe presija hadomi malu no perdua malu bainhira halo sala.
Dom Leandro hatutan husu mos ba sarani sira, prepara an ho didiak atu kontempla Misteriu Jesus Kristu nia terus, no nia mate tamba ema hotu nia sala.
“Atu hadia ita nia aan diak liu tan, prepara ita nia an atu kontempla Misteriu ita Na’i Jesus Kristu nia terus mate no moris hias, la’os ba ema seluk maibe mos ba ita ida idak, ita haree ida ne’e Jesus nia domin Maromak nia domin mai ita, ita buka atu hatudu ita nia domin ba Maromak liu husi ita nia hahalok diak sira”. Dehan Dom Leandro Maria Alves iha missa Domingu Ramus iha Kadedral Diocese Baucau domingu, 29/03/2026
Bispu Diocese Baucau Dom Leandro hateten, Jesus nafatin haklaken justica Paz, no hatudu domin ba ema hotu maske nia sala nain ida.
“Jesus nia hahalok ida haklaken justica paz no eduka domin ba ema hodi hanorin katak Maromak hadomi ema hotu no sei la husik ema ida mesmu ke nia sala nain, oinsa halo ema seluk laran nakali lakohi simu no lori nia ba mate, Jesus fo hanoin mai ita atu ita buka husik ita nia hahalok aat sira ne’e, ita hateke ba ita nia Jesus kriatu ninia esperensia, nia moris, halo mos ita hateke ba ita nia vida iha ita nia sosiadade ema barak dala barak la gosta ho ema halo diak, ema barak mak dala barak sente ofendidu ou ofendida ba ema ne’ebe diak ida ne’e akontese iha ita Na’i Jesus Kristu kedas”. Haktuir Leandro
Domingu Palma marka inísiu Semana Santa tempu ne’ebé sagradu liu iha kalendáriu sarani nian, no Domingu ne’e komemora Jesús nia entrada triunfál iha Jeruzalém, bainhira ema-lubun kumprimenta nia ho ai-palmeira nia sanak sira, no hahi’i ho ksolok.
Enkuantu Domingu Palma fó hanoin ba sarani sira atu nafatin fiel ba Kristu, la’ós de’it iha tempu ksolok nian, maibé mós iha tempu susar nia laran.
