RCLM Baucau (04-12-2025)—Komite Paralimpiku Nasionál Timor-Leste (CPNTL sígla portugés) iha Munisípiu Baucau husu Governu liuhusi Ministériu Juventude Desportu Arte no Kultura (MJDAK), kria fasilidade desportu ba atleta ema ho defisénsia iha Baucau.
Responsavel CPNTL Munisípiu Baucau Tomas Martins Gusmão hateten, atleta ema ho defisénsia kompostu husi modalidade tenis meza, badminton, satur iha Munisípiu Baucau sempre tuir kompetisaun nivél Nasionál no Internasionál hodi hamorin Timor-Leste nia naran, tamba rekolla tasa no medalla maibé difikuldade sira hasoru laiha fasilidade treinamentu iha Munisípiu.
”Ami nia rekomenda ba MJDAK tau atensaun desportu ba ema ho defisénsia, iha modalidade ema ho defisénsia sempre tuir iha nasaun mak hanesan tenis meza, badminton, satur no modalidade seluk tan. Durante ne’e atleta EhD husi organizasaun CPNTL ba treinu nasionál foin ba kompete, maibe Baucau ba Dili distansia dok entaun desportu ne’e presiza lori mai Munisípiu para ema ho defisénsia bele partisipa,” Tomas hato’o rekomendasaun ne’e hafoin partisipa loron mundiál EhD iha CCB vila Antiga (03/12/2025).
Hatan ba rekomendasaun ne’e Diretór Nasionál Asosiativizmu Juventude husi MJDAK Mário Tilman deklara, kona-bá kria fasilidade desportu ba ema ho defisénsia Ministeriu Desportu Arte no kultura sei iha faze planeamentu no seidauk serteza atu bele implementa, tamba tékniku sira seidauk halo levantamentu.
”Kona-ba ida ne’e (kria fasilidade desportu ba ema ho defisénsia) foin ita tau ba planu tinan lima nian, iha planu asaun anuál ba ema ho defisénsia tau ona ne’eba, maibé seidauk iha definisaun depende posibilidade aloka osan ba área ida ne’e, teknikamente ko’alia nune’e tamba ami ekipa embaxador ba asuntu ida ne’e, maibé polítikamente depende desizaun governu tuteladu,” dehan Mário.
Diretór Nasionál MJDAK afirma, mezmu planu referida seidauk serteza atu kria fasilidade desportu ba ema ho defisénsia iha Munisípiu Baucau, maibe governu liu husi MJDAK nafatin konsidera ema ho defisénsia sira nia preokupasaun tamba antes atleta EhD sempre reprezenta Nasaun Timor-Leste partisipa kompetisaun nivél internasionál.
”Atu dehan katak sensivél tebes tamba ita hotu akompaña ita nia maluk defisénsia sira sempre reprezenta ita nia nasaun partisipa eventu Internasionál sira iha área desportu nian, ne’ebé sempre suporta husi Ministériu Juventude Desportu Arte no Kultura signifika Ministru preokupa no sensivél tebes ita nia maluk ema ho defisénsia,” tenik Diretór Nasionál Asosiativizmu Juventude husi MJDAK
Entretantu atleta EhD iha Munisípiu Baucau kompostu modalidade tenis meza, badminton no modalidades seluk atu partisipa kompetisaun nivél Nasionál no Internasionál halo treinamentu iha nasionál, maibé ho distansia dok tamba ne’e organizasaun CPNTL Baucau husu atu kria fasilidade treinamentu iha nivél Munisípál.
Ekipa Kobertura : RCLM
