RCLM (13-02-2026)—Bispo Diocese Baucau konsidera kolaborasaun ema hotu nian, sei aselera projetu dezenvolvimentu reabilitasaun estrada urbana 23 kilómetru, no konstrusaun merkadu Munisipál modernu ne’ebe Governu hamutuk ho Autoridade Munisipál lansa ona fatuk dahuluk.
Bispo Don Leandro Maria Alves esplika, lansamentu fatuk dahuluk ba projetu reabilitasaun estrada urbana Baucau tinan barak povu hein, maibe governu konsege realiza ona sei faselita movimentu komunidade nian, maibe kompaña implementador sira at aselera projetu dezenvolvimentu ne’e presiza ema hotu nia kontribuisaun.
“Ita nia dezenvolvimentu atu la’o lalais no di’ak, ita hotu partisipa la’os de’it ita nia kompaña sira mak hala’o, maibe ita hotu partisipa liu husi buka, fó liman ba malu,” hateten Bispo Diocese Baucau iha nia kna’ar fatin vila Antiga.
Bispo Diocese Baucau avalia katak, implementasaun reabilitasaun estrada urbana ne’e balun afeta ba komunidade sira nia ai-horis no seluk, maibe liu husi dialogu bele fo solusaun di’ak nune’e labele hamosu impedementu ba projetu liga dezenvolvimentu dadaun ne’e la’o iha Baucau.
“Dezenvolvimentu la’o duni ita nia rain Baucau, buka fo´liman ba malu ko’alia, diálogu maneira ne’ebé mak di’ak atu nune’e hotu-hotu fuan bo’ot kakutak malirin, atu bele aselera dezenvolvimentu iha ita nia Baucau,” Don Leandro ekoraja.
Lideransa igreja Rejiaun Leste ne’e konklui, Governu liu husi maneira oi-oin halo dezenvolvimentu, tamba benifisia ba komunidade no oinsá hatudu imajem Baucau nafatin hanesan segundu kapitál iha Timor-Leste.
Entertantu rekorda fali katak, estrada urbana Baucau hamutuk 23 km, governu lansa fatuk dahuluk iha loro 06 fulan fevereiru ne’e, dadaun kompanã konstrutór hahu halo servisu no iha loron 12 governu halo tan lansamentu fatuk dahuluk konstrsaun merkadu foun Munisipál Baucau iha Tua-nau, no iha tempu besik sei lansa tan projetu fornesementu bee-moos ba komunidade área urbana Baucau.
Ekipa Kobertura : RCLM
