RCLM Baucau (13/01/2025)—Inisiu fulan janeiru tinan 2026 Hospital Regional Eduardu Ximenes Baucau infrenta problema reagente ba CBC (Complete Blood Count) no regente ba Biokimia ne’ebe atu faselita halo ezaminasaun ba pasiente sira maibe dadaun ne’e stock out.
Diretur Ezekutivo HoREX Baucau Claudino Ximenes hateten, kazu urujente sira ne’ebe mak mediku sira atu halo tratamentu presija halo uluk diagnostiku ne’ebe kompostu husi rediologia, laboratorium, hodi halo ezaminasaun ba ran hasai raio-x atu bele detekta ema nia moras hafoin halo tratamentu, enkuantu diagnostiku sira seluk la’o hanesan bai bain.
Claudino afirma relasiona ho preokupasaun ne’e hato’o ona pedidu ba dirasaun laboratorium nasional, atu bele responde emediatamente ba reagente ne’ebe dadaun ne’e stock out.
“Reagente sira ne’e tutela hotu iha Laboratorium Nasional mak bele halo komprasa entaun reagente hotu hotu dala barak ne’e ita hola iha rai liur entaun prosesu sira ne’e mos tenke la’o tarde, depende ita hola nia kuantidade ne’e hira ida nee mos tuir prosesu ida, entaun ida ne’e mak mai ne’e tarde, antes buat sira hotu ami halo ona pedidu ba, soke ami la iha osarsamentu ruma atu bele tau para atu hola buat sira ne’e tamba ne’e mak ami depedensia ba Laboratorium Nasional para bele aranja reagente rua ohin hau temi ba ezamisaun ba CBC no ezaminasaun ba biokimika”. Dehan Diretur Ezekutivo HoREX Baucau ba jornalista RCLM segunda feira, 12/01/2026.
Diretur Ezekutivo ne’e hatutan pasiente balun obrigadu halo transferensia ba Hospital Nasional Guidu Valedares Dili tamba atu halo sitisken no halo ezaminasaun ba pasiente sira ne’ebe moras iha kakutak.
“Pasiente sira ne’ebe mak transfere mos laos kauza husi diagnostiku ida ohin hau temi ne’e ba laboratorium, maibe iha mos pasiente sira seluk ne’ebe ita halo transferensia, hodi halo diagnostiku liu liu moras ne’ebe mak kona kakutak ne’e presija halo ezamisaun iha HNGV, tamba setisken ne’e iha deit HNGV iha mos pasiente sira ne’ebe maka moras korasaun, maske ita iha ne’e mediku espesialista kurasaun ne’e iha, maibe tenke halo transferensia ba Dili liu liu halo diagnostiku iha Laboratorium”. Haktuir Claudino
Entertantu aimoruk iha Hospital Regional Eduardu Ximenes Baucau sufsiente hela hodi halo atendimentu ba pasiente sira, enkuantu aktividade atendimentu ba pasiente sira iha inisiu fulan janeiru tinan ne’e la’o hanesan bai bain.
Ekipa Kobertura : RCLM
