RCLM Baucau (19-11-2025)—Autoridade Munisipal Baucau kuarta ne’e realiza sorumutu ho sosiedade sivil, parseiru dezenvolvimentu no grupu intelektual hodi halo konsultasaun publiku ba planu dezenvolvimentu munisipal tinan 2025 to’o 2030.
Sekretaria Munisipal Asuntu Sosial no Organizasaun Maria Celestina Viegas hateten, konsultasaun publiku ne’e prioriza setor Saúde, Edukasaun, inkluzaun social, infraestrutura, ekonomia no institusional, alende ne’e halo revizaun ba planu dezenvolvimentu munisipal husi tinan 2019 to’o tinan 2023 ba kotuk.
“konsultasaun públiku ne’e relasiona ita nia planu estratejiku munisipál ne’ebé kada tinan lima ita halo revizaun planu ne’ebé realiza ona no balun ne’ebé seidauk, entaun 2025-2030 ita presiza hare fila-fali no husu parte hotu nia hanoin oinsá halo dezenvolvimentu iha ita nia munisipiu iha setór haat hanesan saúde-edukasaun, infraestrutura, ekonomia no institusionál,” Sekretaria Munisipal Asuntu Sosial no Organizasaun esplika ba Jornalista sira iha salaun apuramentu munisipiu Baucau kuarta ne’e.
Kordenador Asosiasaun ONG Baucau Crispin Malic hateten, konsultasaun publiku entre sosiedade sivil ho Autoridade Munisipal importante tebes tamba elabora opiniaun hamutuk, hodi trasa ba planu dezenvolvimentu munisipal Baucau.
Atual Diretor Fundasaun Edukasaun komunidade Matebian afirma, Planu Dezenvolvimentu Munisipal tinan 2025 to’o 2030, tenki prioriza nesesidade povu nian hanesan Saúde, Edukasaun no infraestrutura báziku seluk.
“Planu ne’ebé elabora liu-liu Edukasaun, Saúde ho infraestrutura ne’e importante tebes tamba, baze ba komunidade sira nia moris,” Crispin Malic propoin.
Entretantu sorumutu konsultasaun publiku ba Planu Dezenvolvimentu Munisipal Baucau tinan 2025 to’o 2030 durante loron ida no lidera husi Sekretariu Munisipal Asuntu Social no organizasaun, Diretor Ajensia Planeamentu Dezenvolvimentu Munsipál no Asesor husi Organizasaun PARTISIPA.
Ekipa Kobertura : RCLM
