RCLM Baucau (15-12-2025)—Estrutura Asembleia Postu Administrativu (ASPA) Venilale Munisípiu Baucau konvoka reuniaun ordinariu, hodi avalia servisu no ezekusaun orsamentu anuál tinan fiskál 2025.
Prezidente ASPA Venilale José Freitas Boavida hateten, reuniaun ordinariu asembleia Postu Administrativu da-ikus ho objetivu aprezenta relatóriu ejekusaun orsamentu tinan fiskál 2025, alende ne’e relata relatóriu implementasaun projeitu Programa Nasionál Dezenvolvimentu Suku (PNDS).
Iha reuniaun ordinariu asembleia Postu Administrativu ne’e, Administradór Postu Administrativu Venilale sente onradu tamba membru ASPA na’in 32 partisipa ativu ho ideas konstruitivu durante avaliasaun ba relatóriu ezekusaun orsamentu no implementasaun PNDS tinan ida nia.
”Orsamentu ba Postu Administrativu Venilale aloka ba bens no servisu hamutuk sete mil ohin transparente ba membru asembleia tomak no implementasaun PNDS atinjimentu 100%, prosesu dezenvolvimentu no desentralizasaun husu ema hotu nia partisipasaun, tamba ne’e hanesan Prezidente ASPA hare membru partisipa ativu ho objetivu atu defende povu ida ne’e nia direitu ba prosesu dezenvolvimentu tamba ne’e hau senti orgullu tebes no espresa domin katak Venilale tenke hamutuk nafatin hodi tau hanoin konstruitivu hodi tau prioridade ba povu,” hateten Prezidente ASPA Venilale.
Sekretariu Munisipál Asuntu Sosiál no Organizasaun Maria Celestina Viegas apresia aprezentasaun relatóriu ezekusaun orsamentu tinan 2025, no implementasaun projetu PNDS Postu Venilale tamba la’o di’ak no tuir planu trasa.
”Ita hare aprezentasaun relatóriu husi xefe servisu lokál sira la’o iha Postu Administrativu Venilale la’o ho di’ak oinsá sira iha koperasaun servisu xefe suku na’in ualu hodi hare problema no projetu sira, Apresia ba servisu sira xefe suku, xefe servisu lokál, Administradór Postu halo tuir planu asaun anuál maibe husu hare ba planu 2026 hodi atende ba komunidade sira liu problema sosiál hanesan bee-moos ba ema ho kondisaun espesiál (ema ho defisénsia)” hateten Maria.
Entertantu, alokasaun OJE fiskál 2025 aloka ba Administrasaun Postu Administrativu Venilale ho kategória bens no servisu korrentes, montante dolár amerikanu rihun hitu ($ 7.000,00) no ejekuta atinji (92,36%).
Implementasaun projetu PNDS tinan 2025 iha suku ualu (8) hamutuk sia, halo manutesaun kanalizasaun bee-moos, konstrusaun bee-moos sistema bomba, konstrusaun mini irrigasaun no projetu seluk halo reabilitasaun estrada konkluidu (100 %).
Postu Administrativu Venilale hamutuk suku ualu (8) hanesan suku Badu-Ho’o, Baha-Mori, Fatulia, Uatu-Haco, Uai-Laha, Uai-Oli, Uma-Ana-Iku no Uma-Ana-Ulo ho totál aldeia tolu nolu resin lima (35), no rejista uma-kain hamutuk rihun lima, atus tolu ualu (5.308), populasaun hamutuk rihun rua nolu resin tolu, ualu nolu resin tolu (23.083).
Ekipa Kobertura : RCLM
