RCLM Baucau (24-02-2025)—Autotoridade Munisipál Baucau (AMB) realiza sorumutu Konsellu Kordenasaun Munisipál (KKM), hodi aprezenta kona ba dezenvolvimentu Munisipál.
Prezidente KKM atual Prezidente Autoridade Munisipiu Baucau Veneranda Eurico Lemos Martins hateten, liu husi reuniaun konsellu kordenasaun Munisipál membru sira bele fó apresiasaun ba aprezentasaun programa dezenvolvimentu Munisipal sira, hafoin kontinua ba konsellu konsultivu Munisípál ne’ebe kada tinan realiza dala-rua.
“Sorumutu ida ne’e ko’alia kona ba dezenvolvimentu no programa iha Munisipiu Baucau atu membru sira halo epresiasaun ba programa sira ne’e hotu, hafoin ami lori fila fali ba konsellu Konsultivu Munisipál, Konsellu Kordenasaun ida ne’e ita halo kada fula-fulan,” dehan PAM Veneranda Lemos iha salaun iha Apuramentu Munisipál tersa ne’e.
Iha reuniaun Konsellu Kordenasaun Munisipál Autoridade Munisipál ne’e, aprova mos ajenda kada diresaun Servisu Munisipál no delegasaun territorial, atu aprezenta relatoriu atinjimentu no nia kontajimentu sira iha Konsellu Kordenasaun Munisipal, hodi hetan apresiasaun husi membru sira.
“Hanesan prezidende Konsellu Kordenasaun Munisipál ami kria ambiente ida atu delegasaun territorial labele sente ninia responsabilidade ba de’it governo sentrál, maibe sira tenke hola parte iha prosesu administrasaun ninian iha Munisipiu, tamba konsellu ne’e loke mos oportunidade ba delegasaun territorial sira atu hato’o sira nia programa, atinjimentu no kontanjimentu iha prosesu administrasaun no prosesu atendementu publiku, tamba ne’e ami hateten konsellu kordenasaun ne’e importante,” PAM Baucau konklui.
Entertantu iha sorumutu KKM ne’e Autotoridade Munisipál Baucau liu husi servisu Munisipal patrimoniu no lojistika aprezenta patrimoniu estadu no moveis, aprezentaun planu Munisipál ba formasaun rekursu umanus, aprezentasaun sumáriu planu estratejiku dezenvolvimentu Munisípál Baucau, aprezentasaun lista planu programa PNDS tinan 2026 no 2027 no aprezentaun eleitor trata kartaun semi Biométriku ba Biométriku.
Membru konsellu kordenasaun ne’e kompostu husi Prezidente Autoridade Munisipál ho estrutura, Diretor Servisu Munisipál, Servisu Delegasaun Territorial, Administrador Postu Administrativu ualu no xefe suku balun.
Ekipa Kobertura : RCLM
