RCLM Baucau (19/01/2026)—Relasiona udan no anin boot ne’ebe akontese segunda feira ne’e mais ou menus tuku sia ho balun oras Timor-Leste ai-kafe hun ida tohar hanehan vitima Natacia Joselinha Belo Fraga idade 23 mate fatin iha aldeia Lutumutu, suku tirilolo Munisipiu Baucau.
Aman Vitima Carlito de asis fraga hateten kronologia akontesementu, bainhira vitima fase hela roupa iha Torneira publiku besik uma hela fatin derepente ai-kafe tohar monu hanehan vitima hafoin familia no viziñus ajuda hasai vitima husi ai hun okos, hodi evakua ba Hospital Regional Eduardo Ximenes Baucau, maibe la konsegue salva nia vida tamba tuir dalan iis la iha ona, tamba hetan pankada maka’as iha ulun no kakorok kotuk.
Nia afirma nudar aman sente triste tebes ho dezastre ne’ebe la espera.
“Akontesementu ida ohin ne’e, primeiru sira lori roupa atu ba fase iha ne’eba hau mos tur iha kotuk ne’eba derepente labarik sira hakilar maun lito hafoin hau halai ba vitima toba tiha ona iha ai okos ne’eba, entaun hau hare ida ne’e sente trauma, entaun hau mos hala’i fila fali tanis deit ona hafoin familia no vijiñus sira mai hit sa’e ai mak foin dada sai nia hodi ba hospital maibe iha ne’e dala nia iis kotu tiha ona”. Dehan Vitima Nia aman ba jornalista sira iha nia rezidensia Segunda feira, 19/01/2026
Entertantu Xefe suku Tirilolo Elvino Freitas Belo hateten, depois de simu tiha informasaun husi Familia vitima to’o kedas iha Fatin akontesementu hodi halo identifikasaun no rekola dadus ba dezastre ne’e.
“Tuir informasaun ne’ebe mak hau rona husi familia katak hau nia komunidade husi suku Tirilolo aldeia Lutumutu katak ohin dadarsan nia fase roupa iha torneira ga TP nia okos, maibe hodi kalan kuaze tuku rua ga tuku tolu hanesan ne’e udan no anin maka’as entaun ita hare rai dodok ona, entaun nia mos la espera katak la iha asidente ruma entaun nia fase hela roupa iha TP okos, derepente ai ne’e tohar monu los ba nia leten habit nia ulun, entaun familia sira besik mos la hatene maibe viziñus sira mak hetan kuaze nain lima hanesan ne’e mak mai hit sae ai ne’e hodi lori vitima ba Hospital maibe la konsege salva nia vida” Haktuir Xefe suku
Matebian Natacia Joselinha Belo Fraga husik hela nia oan mane ida no nia laen kaben, enkuantu tuir planu serimonia funebre ba matebian Natacia Joselinha Belo Fraga iha kuarta feira ne’e iha Semiteriu publiku Tirilolo Baucau.
Ekipa Kobertura : RCLM
