RCLM-Baucau (27-10-2025)—Timor-Leste ofisialmente sai membru Asosiasaun Nasaun Sudeste Aziátiku (ASEAN) ba dala-11 iha loron 26 fulan outubru tinan 2025 ne’ebe ratifika serimonia asinatura deklarasaun adezaun Timor-Leste ba Asean, ne’ebé hala’o iha Kuala Lumpur Malaysia iha ne’ebe nu’udar historia foun Timor-Leste nian iha era Independensia.
Hafoin komemora Timor-Leste sai membru Asean permanente Prezidente Autoridade Munisipiu Baucau Veneranda Eurico Marques Lemos Martins hateten, Timoroan tenke prepara an liu husi hakbi’it rekursu umanus área hotu-hotu, hodi kompete ho nasaun Asean ne’ebe dezenvolvidu, aumenta produsaun agrikola hodi fo sustentabilidade povu no dezenvolve infraestrutura area seluk ne’ebe fó benifisia ba kada Munisipiu no nasaun.
“Ita simu ona (ASEAN) agora ita prepra ita nia an atu kompete no prepara an atu kontribui dezenvolvimentu, ita hotu hatene setor importante ida mak rekursu umanus, entaun ho ita nia adezaun ba Asean ita espera hakbi’it liu tan ita nia rekursus umanus iha setor hotu-hotu,” dehan PAM Veneranda iha resintu Administrasaun Munisipal Baucau Domingo (26-10-2025).
Autoridade Komunitariu Suku Larisula Postu Administrativu Baguia Jorje de Almeda apresia ba esforsu estadu no govenu nian, tamba marka tan historia foun ida sai membru Asean, maibe presiza dezenvolve area potensial sira hodi fo redementu ekonomia .
“Autoridade Komunitariu sente agradese ba governu sira nia esforsu hotu ita susesu sai membru Asean maibe presiza ita nia ekonomia hodi halo kompetisaun ba investidor sira,” hateten Xefe Suku Larisula.
Entertantu komemorasaun Timor-Leste sai membru Asean ba dala-11 iha munisipiu Baucau priense ho atividade hahu misa agradesementu, konsertu muzika, aprezentasaun drama, hola parte iha loron importante ne’e kompostu husi prezidente Autoridade Munisipal ho estrutura, Administrador Postu Administrativu Ualu, Diretor Servisu Munisipal no Delegasaun Territorial, Xefe Suku neen nolu resin rua ho Funsionariu Suku inklui Sosidedade Sivil no Konfiosoens Relijiosu.
Ekipa Kobertura : RCLM
